Dubayda tez tibbiy yordam mashinasi sifatida uch g‘ildirakli superkardan foydalaniladi

Dubayning tez tibbiy yordam korporatsiyasi (DCAS) Arab Health 2018 tadbirida shifokorlarni chaqiriqqa ko‘ra 200 km/soat tezlik bilan bemorlar oldiga yetkazuvchi, uch g‘ildirakli Polaris Slingshot superkarini taqdim qildi. Bu haqda The Khaleej Times nashri xabar bermoqda.     

DCAS vakilining aytishicha, tomi va eshigi yo‘q bu rodster tez tibbiy yordam ko‘rsatish uchun zarur barcha jihozlar bilan ta'minlangan va hattoki yo‘llar yo‘q joyda ishlatilishi mumkin.

“Biz bu mashinalardan qayerda foydalanish samarali ekanini aniqlamoqchimiz va zaruratga ko‘ra ularning sonini ko‘paytiramiz”, deb aytgan DCAS vakili.

Oldida ikkita g‘ildirak joylashgan Slingshot superkarlari AQShning Polaris kompaniyasi tomondan ishlab chiqariladi. Ular 2,4 litrli, 173 ot kuchiga ega Ecotec dvigatellari va 5 pog‘onali mexanik uzatmalar qutisi bilan jihozlanadi. 

DCAS avtoparkida ilk sportkarlar – Lotus Evora va Ford Mustang 2014 yilda paydo bo‘lgan. Ular og‘ir ahvolda bo‘lgan bemorlarga birinchi yordam ko‘rsatish uchun dori-darmonlar to‘plami bilan jihozlangan.      

Statistikaga ko‘ra, o‘sha vaqtda BAAda tez tibbiy yordam mashinasi bemornikiga o‘rtacha 8 daqiqada yetib borgan, biroq yangi mashinalar oldiga bemor oldiga 4 daqiqadan kamroq vaqt ichida yetib borish vazifasi qo‘yilgan. 

Biroq bu mashinalar kasallarni tashish uchun mo‘ljallanmagan va shifoxonaga yetkazilishi kerak bo‘lganlarga an'anaviy tez tibbiy yordam mashinasi yoki vertolyotni kutishga to‘g‘ri keladi.