Oʻzbekistonning Dubaydagi Bosh konsulxonasi BAAda ogʻir hayotiy vaziyatga tushib qolgan Oʻzbekiston fuqarosining vatanga qaytishiga yordam berdi. Bu haqda «Dunyo» axborot agentligi xabar qildi.
Bosh konsulxona maʼlumotiga koʻra, U.R. ismli fuqaro BAAga ishga joylashish maqsadida borgan. Biroq u xorijga chiqishidan avval Oʻzbekiston Migratsiya agentligiga murojaat qilmagan va amirlikka yetib borgach, mustaqil ravishda ish izlay boshlagan.
Fuqaro oʻziga munosib ish topa olmagani sababli moliyaviy qiyinchiliklarga duch kelgan. Oqibatda uning yashash va ovqatlanish xarajatlarini qoplash uchun mablagʻi qolmagan. Shuningdek, Oʻzbekistonga qaytish uchun aviachipta sotib olish imkoniyati ham boʻlmagan.
Bosh konsulxona diplomatlari fuqaro bilan suhbatlashib, uning vaziyatini oʻrgangan. Shundan soʻng unga vaqtinchalik turar joy va oziq-ovqat taqdim etilgan.
Keyinchalik fuqaroning Dubaydan Oʻzbekistonga qaytishi uchun zarur amaliy yordam koʻrsatilgan va u vatanga qaytarilgan.
Hodisa munosabati bilan xorijda ishlashni rejalashtirayotgan Oʻzbekiston fuqarolariga safardan oldin Migratsiya agentligiga murojaat qilish tavsiya etildi.
Qayd etilishicha, agentlik orqali xorijda rasmiy va xavfsiz ishga joylashish, mavjud vakansiyalar haqida maʼlumot olish, ish beruvchilar bilan bogʻlanish hamda zarur hujjatlarni rasmiylashtirish boʻyicha yordam olish mumkin.
Dubaydagi Bosh konsulxona esa xorijda qiyin vaziyatga tushib qolgan Oʻzbekiston fuqarolariga amaldagi qonunchilik doirasida konsullik-huquqiy va amaliy yordam koʻrsatish ishlari davom ettirilishini bildirdi.
