Floridada AR-15 miltig‘ini sotishga taqiqlov bor-yo‘g‘i 15 daqiqa amal qildi

AQShning Florida shtati senati 14 fevralda shtatdagi maktablardan birida sodir etilgan otishmadan keyin qurolga egalik qilish bo‘yicha tuzatmani tasdiqladi, biroq 15 daqiqa o‘tgach o‘z qaroridan voz kechdi. Bu haqda Tampa Bay Times nashri xabar bermoqda.

Nashr ma'lumotlariga ko‘ra, shtat senati 3 mart kuni yig‘ilish o‘tkazib, unda Floridada qurol aylanmasi qoidalarini qat'iylashtirishni muhokama qilgan. Deputatlar Floridadagi otishmani sodir etishda qotil qo‘llagan AR-15 miltig‘ini sotishga ikki yillik taqiqlovni tasdiqlashgan, biroq bor-yo‘g‘i 15 daqiqadan keyin o‘z qarorlarini o‘zgartirishgan.

Qonun loyihasi maktablarda xavfsizlikni ta'minlashga mablag‘ ajratish hamda miltiq sotib olishga ruxsat etiladigan minimal yoshni 18 yoshdan 21 yoshgacha oshirishni ko‘zda tutgan. 

Qayta ovoz berishda tuzatma uchun 17 kishi ovoz bergan, 21 kishi qarshi chiqqan.

Ma'lum qilinishicha, Florida senati qurol aylanmasi bo‘yicha yakuniy yig‘ilishni 5 mart kuni o‘tkazadi.

AQShda qurol olib yurish konstitutsiyaga 2-tuzatma bilan kafolatlangan. Qurolni cheklash haqidagi bahslar 14 fevralda Floridadagi maktabda 17 kishi otib tashlangandan keyin yana faollashdi.