AQSh toliblarga aloqador uch terrorchi haqidagi ma'lumot uchun 11 mln dollar va'da qildi

AQSh Davlat departamenti Afg‘onistondagi «Tolibon» harakati bilan aloqador bo‘lgan «Tahriq Tolibon Pokiston» guruhining uch terrorchisi haqidagi ma'lumot uchun umumiy hisobda 11 mln dollarlik mukofot va'da qildi. Bu haqda Qo‘shma Shtatlar Davlat departamenti saytidagi xabarda aytiladi.

5 mln dollar guruh yetakchisi Mavlono Fayzullo uchun taklif etilyapti, yana 3 mln dollardan Abdul Vali va Mang‘al Bag‘ haqidagi ma'lumotlar uchun to‘lab beriladi. Davlat departamenti ma'lumotlariga ko‘ra, Fayzullo 2010 yilda Nyu-Yorkda sodir etilishi rejalashtirilgan muvaffaqiyatsiz teraktga aloqador. O‘shanda Pokistondan bo‘lgan Faysal Shahzod Tayms-skverda bombani portlab yuborishni mo‘ljallagan.

Uning yetakchiligidagi guruh Pokistonning Peshovar shahridagi maktabda 2014 yilda 148 nafar bola va o‘qituvchilar o‘ldirilishiga mas'uldir. Shuningdek, u 2012 yilda Nobel tinchlik mukofotining bo‘lajak laureati Malala Yusufzoyga hujum uyushtirilishiga javobgar.

Abdul Vali «Tolibon»dan chetlashgan «Jamoat al-Ahror» guruhiga yetakchilik qiladi. Vali, Davlat departamenti xabariga ko‘ra, Pokistonda tinch aholi vakillari, diniy ozchilik va huquqni muhofaza qilish organlariga hujumlar, shuningdek, Peshovorda AQSh konsulligining ikki xodimi o‘limi uchun mas'ul. Bag‘ – NATO konvoylariga hujum qilgan, shuningdek, Davlat departamentiga ko‘ra, Pokiston va Afg‘onistonda narkosavdo hamda odamlarni o‘g‘irlash bilan shug‘ullangan «Lashkari islom» guruhi yetakchisi.