Tojikiston o‘z chegarasi orqali «Tolibon»ga qurol yetkazib berilganini rad etdi

Tojikiston Afg‘oniston bilan chegarasi orqali «Tolibon» harakati uchun qurol-yarog‘ olib o‘tilgani haqidagi ma'lumotlarni rad etadi. Bu haqda Tojikiston Tashqi ishlar vazirligi rasmiy bayonotida aytilgan.

Afg‘onistondagi AQSh kuchlari qo‘mondoni general Jon Nikolson 23 mart kuni Bi-bi-si’ga bergan eksklyuziv intervyusida, «Tolibon» harakatiga Tojikiston chegarasi orqali qurol-yarog‘ yetkazib berilgani borasida asossiz bayonot bergani chuqur afsusga sabab bo‘lmoqda, deyiladi TIV xabarida.

«Tojikiston «Tolibon»ning qonuniyligini hech qachon tan olmagan va, afg‘on mojarosini tezda tinch yo‘l bilan hal qilishni qo‘llab-quvvatlovchi mamlakat sifatida hech qachon uchinchi davlatlarga tinchlik va xavfsizlik masalalarida davlatning fundamental yondashuvlari va prinsipial pozitsiyasiga qarshi bo‘lgan bunday harakatlarni amalga oshirish uchun o‘z hududini taqdim etmagan», - deya ta'kidlanadi bayonotda.

Eslatib o‘tamiz, avvalroq AQSh qurolli kuchlari va NATOning Afg‘onistondagi qo‘mondoni general Jon Nikolson Rossiya va Eron «Tolibon» harakatini qo‘llab-quvvatlayotgani haqida ma'lum qilgandi.

Qo‘mondonning ma'lum qilishicha, yuqorida nomi zikr etilgan ikki davlat jangarilarni o‘qitmoqda, shuningdek, ularga pullar va harbiy texnika taqdim etmoqda. Generalning taxminicha, Rossiya hamda Eron shu tariqa toliblarni IShID guruhiga qarshi kuch sifatida ko‘rmoqda.

Rossiyada har ikki guruh taqiqlanganiga qaramay, Moskva bir necha bor toliblarni qo‘llab-quvvatlashda ayblandi. RF TIV bu ayblovlarni rad etib kelmoqda, biroq shunday bayonotlar ham g‘arbdagi siyosatchilar, ham NATO qo‘mondonligi vakillari tomonidan berilmoqda.