Xitoydan Markaziy Osiyoga birinchi tovar poyezdi yo‘lga chiqdi

Xitoyning markaziy qismidagi Xenan provinsiyasi Sinsyan shahar okrugida joylashgan Tapu stansiyasidan bugun mahalliy vaqt bilan soat 11:00da Markaziy Osiyoning besh davlati tomon birinchi tovar poyezdi yo‘lga chiqdi, deb xabar bermoqda Sinxua.

Ma'lum bo‘lishicha, Sinsyandan yo‘lga chiqqan poyezd Tayyuan, Inchuan, Chjunvey, Uvey, Urumchi shaharlaridan o‘tib, Alashankou nazorat-o‘tkazish punkti orqali Qozog‘iston bilan chegarani Do‘stlik nazorat-o‘tkazish punktidan kesib o‘tadi va keyinchalik Turkmaniston, Qirg‘iziston, Tojikiston hamda O‘zbekistonga yo‘l oladi.

Jadvalga ko‘ra, poyezd bir haftada bir marta reysni amalga oshiradi. Poyezdda 50ta vagon bor, yuk tashuvlarining yillik hajmi 150 mingdan 200 ming tonnaga qadarni tashkil etadi.

Kutilishicha, bu poyezd asta-sekin «to‘la chiqish, to‘la qaytish» dasturini amalga oshiradi. Bunda Markaziy Osiyo mamlakatlariga mexanik uskunalar, rezinadan mahsulotlar, o‘tga chidamli materiallar va boshqa tovarlar jo‘natiladi, ortga turli xomashyo bilan qaytiladi.