Gvatemalada 36 yillik fuqarolik urushiga yakun yasagan sobiq prezident vafot etdi

Gvatemala sobiq prezidenti va mamlakat poytaxtining sobiq meri Alvaro Arsu Irigoyyen 72 yoshida vafot etdi. Bu haqda Gvatemalaning amaldagi prezidenti Jimmi Morales xabar qilgan.

«Gvatemala buyuk insonni yo‘qotdi, u butun umrini xalqqa xizmat qilishga bag‘ishladi. Siyosatchi, yetakchi va haqiqiy do‘st», - deya yozmoqda Morales tvitterdagi sahifasida.

Reuters ma'lumotiga ko‘ra, Arsu shifoxonada hayotdan ko‘z yumgan.

Alvaro Arsu Gvatemalani 1996 yildan 2000 yilgacha boshqargan. U hukumatning «Gvatemala milliy inqilobiy birdamligi» partizan guruhi bilan tinch kelishuv imzolashiga erishgan. Shu tufayli Gvatemalada 36 yil davom etgan fuqarolik urushi yakun topdi. Arsu 2012 yildan beri mamlakat poytaxti meri lavozimini egallab kelgan.