Fototuzoqlar yovvoyi mushuksimonlarni muhofaza qilish bilan shugʻullanuvchi Panthera tashkiloti va Gvatemalaning muhofaza etiladigan hududlar boʻyicha milliy kengashi - CONAP tomonidan oʻrnatilgan.
Panthera’ning yaguarlarni asrash dasturi direktori Ellison Devlin hamda tashkilotning Hondurasdagi boʻlimi rahbari Franklin Kastanyeda People nashriga bu kabi suratlar juda kam olinishini taʼkidlagan. Ularga koʻra, kadrlar koʻplab tahdidlarga qaramay, yaguarlar mintaqada yashashda davom etayotganining muhim dalilidir.
Oʻrmon yoʻlagi nega zarur?
Gvatemala va Honduras chegarasi boʻylab oʻtuvchi tabiiy yoʻlak Beliz, Gvatemala va Meksikadagi yaguar populyatsiyalarini Hondurasning markaziy hamda sharqiy qismidagi guruhlar bilan bogʻlaydi.
Bunday aloqa hayvonlar guruhlarining bir-biridan uzilib qolishi va yaqin qarindoshlar oʻrtasida chatishish xavfini kamaytiradi. Oʻrmonlar parchalanishi esa ularning harakatlanishini cheklab, alohida populyatsiyalarni yanada zaiflashtirishi mumkin.
Materialda keltirilgan baholarga koʻra, dunyodagi yaguarlarning taxminan 89 foizi Amazonka havzasida yashaydi. U yerdagi yirik populyatsiya turning umumiy holatiga katta taʼsir koʻrsatadi. Gvatemala va Honduras kabi hududlardagi kichik, ajralib qolgan guruhlar esa jiddiyroq xavflarga duch kelmoqda.
Yaguarlar haqidagi tasavvurlar kengaymoqda
Gvatemalada yaguarlarning tarqalishi avval asosan Peten oʻrmonlari bilan bogʻlangan. Yangi kuzatuvlar mamlakat sharqidagi Syerra-de-las-Minas togʻlari va Karib dengizi sohili boʻylab joylashgan Izabal tabiiy yoʻlagida ham bu hayvonlar borligini koʻrsatmoqda.
Tabiat himoyachilari uchun nodir kadrlarning ahamiyati yashirin hayot kechiruvchi yirtqichni suratga olish bilan cheklanmaydi. Ular yaguarlar harakatlana oladigan uzluksiz oʻrmon hududlarini saqlash zarurligini ham koʻrsatadi.
