Xitoy texnoparklari O‘zbekiston bilan innovatsiya sohasida hamkorlik qiladi

O‘zbekiston davlat organlari vakillaridan iborat delegatsiyaning Xitoyga safari doirasida High-tech sanoat zonasi rahbariyati hamda Hunan viloyatining ma'muriy markazi sanalmish Changsha shahrining hokimi bilan uchrashuv bo‘lib o‘tdi. Bu haqida Innovatsion rivojlanish vazirligi matbuot xizmati Kun.uz’ga ma'lum qilmoqda.

Suhbat chog‘ida tomonlar hamkorlikning istiqbolli yo‘nalishlari haqida kelishib, ikki mamlakat o‘rtasidagi innovatsion rivojlanish bo‘yicha munosabatlarning muhim jihatlarini aniqlab oldilar.

Chansha shahri hokimi janob Yi Lianhong, Hunan viloyati ham, shaharning o‘zi ham texnoparklar va sanoat zonalari markazi ekanligini ta'kidladi. Bunday markazlarning asosiy yo‘nalishi mamlakatning barcha sohalarini, ayniqsa, sanoat, AKT, qishloq xo‘jaligi va biotibbiyot sohalarini texnologik va innovatsion jihatdan rivojlantirishdir.

«Biz uchun O‘zbekiston strategik hamkor bo‘lib, mamlakatingizda kechayotgan barcha o‘zgarishlar, jumladan, Prezidentingiz rahbarligida amalga oshirilayotgan islohotlar mamlakatingizga sarmoya kiritish uchun qulayliklar yaratmoqda, shuningdek uzoq muddatli hamkorlik qilishga ishonchimizni orttirmoqda. Biz texnoparklarimiz va sanoat zonalarimiz vakillarini qo‘shma loyihalarni yo‘lga qo‘yish va innovatsiyalarni rivojlantirish uchun O‘zbekistonga jo‘natib, davlatlarimiz o‘rtasidagi ikki tomonlama munosabatlarni mustahkamlashga hissamizni qo‘shamiz», — dedi Changsha shahri hokimi.

O‘z navbatida delegatsiyamiz rahbari, O‘zbekiston innovatsion rivojlanish vazirining birinchi o‘rinbosari Baxtiyor Umarov mamlakatimiz infratuzilmasining turli yo‘nalishlarida innovatsion yechimlarni joriy qilishni boshlaydigan va ularni rivojlantiradigan 100 dan ziyod ilmiy-tadqiqot institutlari, tashkilotlar va boshqa birlashmalar mavjudligini ta'kidladi.

«Biz xitoylik hamkasblarimizning tajribalarini o‘rganib, investitsiyalar va hamkorlik uchun qulay sharoitlar yaratishga shaymiz. O‘zbekiston xalqimiz va davlatimiz gullab-yashnashi uchun xizmat qiladigan yangi g‘oyalar va islohotlar uchun hamisha ochiq. Mamlakatimiz infartuzilmasini va aholimiz turmushining yaxshilanishiga xizmat qiladigan mexanizmlar va mahsulotlar ishlab chiqaradigan qo‘shma ilmiy laboratoriyalar yaratish uchun innovatsion markazlarni yurtimizga taklif qilamiz», — dedi Baxtiyor Umarov.

Qayd etish joizki, mazkur tashrif Huawei kompaniyasi tomonidan davlat organlari boshqaruvini mukammallashtirish va O‘zbekiston aholisiga ko‘rsatilayotgan xizmatlarning samaradorligini oshirish maqsadida O‘zbekiston davlat organlari vakillari uchun tashkil etilgan. Huawei kompaniyasi, shuningdek, O‘zbekiston sanoatining turli sohalariga innovatsion yechimlarni tatbiq qilishga ko‘mak beradi.