Jahon chempionati hakami pora so‘ragani uchun hibsga olindi

Saudiya Arabistoni futbol federatsiyasi hakam Fahad Al-Mirdasiyni kelishilgan o‘yinlarda ishtirok etgani uchun futboldan umrbod diskvalifikatsiya qildi.

Ma'lumki, avvalroq Al-Mirdasiy JCh-2018 o‘yinlarini boshqaradigan hakamlar ro‘yxatiga kiritilgan edi.

Federatsiya matbuot xizmati xabariga ko‘ra, u Qirol Kubogi finalida ishtirok etuvchi klublardan biridan pora so‘ragan.

«2018 yil 11 may kuni Al-Mirdasiy finalga chiqqan klublardan birining vakili bilan bog‘lanib, o‘yinda yordam berish evaziga pul mukofoti so‘ragan. Ayni paytda u hibsga olingan» - deyiladi bayonotda.

Al-Mirdasiy Konfederatsiyalar Kubogi -2017 turnirida uchinchi o‘rin uchun bahsni boshqargan, shuningdek Rio-2016 olimpiadasida ham ishlagan edi va JCh-2018 o‘yinlarini boshqaradigan hakamlar ro‘yxatiga kiritilgan edi. 

Hakam O‘zbekiston terma jamoasi o‘yinlarini ham boshqargan. So‘nggi marta u 2016 yil noyabr oyida o‘tkazilgan, JCh-2018 saralashidan o‘rin olgan Janubiy Koreya - O‘zbekiston (2:1) bahsida bosh hakam sifatida ishlagan edi.