Shimoliy Koreya Tashqi ishlar vazirligi rahbari o‘rinbosari Chxve Son Xining ma'lum qilishicha, KXDR hukumati AQSh prezidenti Donald Tramp va shimoliy koreyalik yetakchi Kim Chen In uchrashuvini bekor qilishi mumkin. Bu haqda Koreya Markaziy telegraf agentligi xabar berdi.
«Agarda AQSh bizning yaxshi niyatlarimizni haqorat qilishda davom etib, o‘zini ahmoqona tutishni bas qilmasa, men oliy rahbariyatga KXDR va AQSh yetakchilari sammitini bekor qilish imkoniyatini ko‘rib chiqish haqida taklif bilan chiqaman», - deyiladi Chxve Son Xining bayonotida.
TIV rahbari o‘rinbosarining bunday reaksiyasiga AQSh vitse-prezidenti Mayk Pens intervyusi sabab bo‘ldi, unda u KXDR Liviya ssenariysini takrorlashi mumkin ekani, bu Koreya yarim orolini butunlay yadrosizlanishiga amal qilinmasa sodir bo‘lishi haqida ma'lum qilgandi.
Uning fikricha, bunday bayonotlar Pens «siyosiy galvars» ekanini ko‘rsatib beradi.
Eslatib o‘tamiz, avvalroq The Washington Post Kim Chen In KXDRda davlat to‘ntarishi yuz berishi mumkinligidan xavfsirayotgani haqida xabar qilgandi.
