Ramazonda qilingan saxovat boshqa oylarga nisbatan 70 marta ko‘p savob keltiradi 

KUN.UZ tahririyati tomonidan taqdim etilayotgan “Islom nuri” dasturi orqali muqaddas Ramazon oyining fazilatlari, uning odoblari, ro‘za tutish borasidagi tavsiyalar berib borilmoqda. Ko‘rsatuvimizning bugungi sonida Ramazonning saxovat oyi ekanligi haqida so‘z boradi. Mehmonimiz “Xo‘ja Alambardor” jome masjidi imom xatibi Rahimberdi Rahmonov.

YouTube'da tomosha qilish

Tas-IX'da tomosha qilish

- Ramazoni sharif saxovat, mehr-muruvvat oyi. Ramazonda biror-bir o‘ksik qalb qolishi kerakmas. Shu sababdan mo‘min-musulmonlarimiz ham beradigan zakotlarini aynan mana shu oyda berishadi. Bu oychalik mo‘minlar tomonidan saxovat qilinadigan oy yo‘q. Zakot, fidya, fitr sadaqalari beriladi, qo‘shimcha xayr-saxovatlar qilinadi. Demak, Ramazon oyi to‘la ma'noda saxovat oyi. Bu oyda qilingan saxovatga boshqa oyda qilingan saxovatga qaraganda yetmish karra ajr bor.

Bitta narsani yoddan chiqarmaslik zarur – saxovatni qildik, ulkan ajrni qo‘lga kiritdik, kimningdir qozoni qaynaydi, kimningdir ishi bitadi, kimningdir ko‘ngli shod bo‘ladi, lekin undanda katta foydani o‘zimiz ko‘ramiz. Alloh taolo Qur'oni karimda marhamat qiladi: “Kim bir solih amal qilsa o‘zi uchun”.

Payg‘ambarimiz alayhissalomning xonadonlarida bir qo‘y so‘yildi. Oysha onamiz shu qo‘yni taqsim qildilar. Rasuli akram alayhissalom kelgach, onamizdan so‘radilar: “Qo‘ydan ro‘zg‘orga nima qoldi?”. Onamiz aytdilarki: “Bitta qo‘li qoldi”. Ya'ni, ro‘zg‘orga qo‘yning bir qo‘lini olib qolib, qolganini tarqatib yuborgan ekanlar. Shunda Payg‘ambarimiz alayhissalom: “Qo‘lidan boshqa hammasi o‘zimizniki bo‘libdi”, dedilar. 

Qarang, ro‘zg‘orga qolgani demayaptilar, tarqatib yuborganimiz bizniki deyaptilar. Kim bo‘lishidan qat'i nazar nima ko‘mak bersak yaxshi, hech bo‘lmasa bu oyda tabassum, shirin so‘zimizni qilaylik, chunki bu ham ehson.

Rasuli akram (s.a.v) ilk payg‘ambar bo‘lgan kunlari Makka tashqarisidan keksa bir ayol shaharga kirib bozorlik qildi. Ishini bitirib uyga qarab ketayotganida qo‘lidagi yuk og‘irlik qildi. Yo‘lovchilardan yordam so‘radi, biroq hech kim yordam bermadi. Bir mahal o‘rta yosh bir yigit kelib, ayolning ikki qo‘lidagi yukni ko‘tarib olib, toki uyiga qadar olib borib berdi. Haligi ayol ostonasiga borgach aytdiki: “O‘g‘lim, men sizning bu yaxshiligingizni qanday qaytarsam? Menda ortiqcha pul yo‘q. Ammo sizga keksalik bir nasihatim bor. Shu kunlarda Makkada Muhammad ismli odam paydo bo‘libdi. Yangi dinga da'vat etayotgan ekan. Agarda shu odamga yo‘liqsangiz, aldanib qolmang. U odam firibgar, sehrgar, yolg‘onchi, kazzob. Yaxshiligingiz evaziga mana shu nasihatimni oling. 

Yordam bergan va shu paytgacha jim turgan yigit to‘satdan shunday dedi: “Siz aytayotgan o‘sha Muhammad – menman”. Ayol seskanib ketib, rasulollohga qaradi, qo‘li bilan qulog‘iga ishora qildi: “Agar quloqlarim eshitgan Muhammad siz bo‘lsangiz, men sizga iymon keltiraman. Ayting, ayting men musulmon bo‘lay”. Rasuli akram alayhissalom kalimani aytdilar. Ayol qaytardi va musulmon bo‘ldi. 

Bir ayolni musulmon bo‘lishiga nima sabab bo‘ldi? Beg‘araz yaxshilik. Vaholanki Payg‘ambarimiz alayhissalom u kishini musulmon bo‘lishga da'vat etmagan edilar, - dedi R.Rahmonov.

Maqola O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaning xulosasi asosida tayyorlandi.