«Amallar niyatlarga qarab e’tiborlidir» - o‘zbekistonlik ulamolar Shavkat Mirziyoyevga minnatdorlik bildirdi

«Tajriba va kuzatishlarimizdan ma’lumki, dunyoning kamdan-kam mamlakatlarida Ramazon oyini munosib o‘tkazish bo‘yicha Davlat Rahbari darajasida alohida qaror qabul qilinadi. Sizning tashabbusingiz bilan qabul qilinayotgan bunday hujjatlar mazkur oyni yuksak insoniy fazilatlar, saxovat va mehr-muruvvat ayyomiga aylantirmoqda» deyiladi Musulmonlar idorasi matbuot xizmati e’lon qilgan maktubda.

Musulmonlar idorasi 16 fevral kuni «Ramazon oyida ehtiyojmand aholini ijtimoiy himoya qilish masalalari»ga bag‘ishlab o‘tkazilgan yig‘ilishdagi tarixiy qarorlarni alohida e’tirof qilgan.

«Ramazon oyi arafasida «Vaqf» xayriya jamoat fondiga 750 milliard so‘m hamda Ijtimoiy himoya milliy agentligi orqali 300 milliard so‘m mablag‘ ajratilishi – davlatchiligimiz tarixida misli ko‘rilmagan muruvvat namunasi bo‘ldi.

Sizning ushbu tarixiy qaroringiz zamirida buyuk muhaddis bobomiz Imom Buxoriy rivoyat qilgan: «Amallar niyatlarga qarab e’tiborlidir», degan muborak hadisi sharifdagi xolis va sof niyatlarning ulug‘ hikmati mujassamdir. Xalq manfaati yo‘lidagi bu g‘amxo‘rlik tufayli minglab oilalarning mushkuli oson bo‘lib, millionlab dillar quvonchga to‘lishi, qancha nogironligi, kasalligi bor kishilarning davolanish va jarrohlik amaliyoti xarajati qoplab berilishi, shubhasiz, yurtimizga fayzu baraka olib keladi», deyiladi bayonotda.

O‘zbekistonlik ulamolarga ko‘ra, prezident Shavkat Mirziyoyev tashabbuskori bo‘layotgan bunday xayrli amallar xalqaro hamjamiyat va dunyo ulamolari tomonidan ham yuqori baholanmoqda.

«Muborak hadisi shariflarda keltirilishicha, «Alloh taolo uchun eng maqbul amal – mo‘minning qalbiga quvonch kiritishdir».

Ulamolar Allohning nazarida bo‘lgan insonlar qalbiga farah bag‘ishlashni Yaratganni rozi qilish bilan qiyoslaganlar hamda siniq ko‘ngillarni ko‘tarish, mahzun dillarga umid berish va insonlarning og‘irini yengil qilish ilohiy muhabbatga sabab bo‘lishini alohida ta’kidlagan.

Yurtimizdagi 2000 dan ziyod masjidlarda Xatmi Qur’onlarning tizimli tashkil etilishi, diniy-ma’rifiy sohadagi keng ko‘lamli islohotlar, jumladan, Imom Buxoriy yodgorlik majmuasi va Islom sivilizatsiyasi markazining barpo etilishi Sizning islom ma’rifatiga qo‘shayotgan bebaho hissangiz ifodasidir».

Shuningdek, diniy idora davlat rahbarini yana bir bor qutlab, unga salomatlik tilagan, marhum ota-onasi haqiga duolar qilgan

«Sizni muborak oy bilan yana bir bor qutlab, sizga mustahkam sog‘lik, oilaviy baxt va mas’uliyatli faoliyatingizda muvaffaqiyatlar tilaymiz. Xonadoningizdan tinchlik-osoyishtalik, fayzu baraka arimasin.

Alloh taolo Sizdek vatanparvar, el-yurt dardi bilan yashaydigan farzandni tarbiya qilgan marhum Miromon ota va Ma’rifatxon onalarimizning oxiratlarini obod, qabrlarini nurga to‘ldirsin.

Yaratgan ushbu muborak kunlarda jonajon O‘zbekistonimizni o‘z panohida asrasin, ezgu niyatlarimiz ijobatini bersin», deyiladi xatda.

Maktub muftiy – shayx Nuriddin Xoliqnazar, shayx Abdulaziz Mansur, Homidjon Ishmatbekov, Zayniddin Eshonqulov, Rahmatulloh Termiziy, Rahimberdi Rahmonov, shayx Alijon qori Haydarov va Ismoil Muhammad Sodiq kabi o‘nlab olimlar tomonidan imzolangan.