O‘z manfaati yo‘lida davlatga zarar yetkazgan shaxslarga nisbatan sud hukmi o‘qildi

Joriy yilning 25 may kuni Toshkent viloyati, O‘rtachirchiq tumanida joylashgan «O‘rtachirchiq agro-sanoat va transport kasb-hunar» kolleji binosida sud sohasida o‘tkazilayotgan islohotlar va tadbirkorlik sub'yektlarining huquqiy asoslari mavzusida uchrashuv o‘tkazildi. Tadbirda kollej rahbariyati, O‘rtachirchiq tuman sudi, O‘rtachirchiq tuman prokuraturasi, mahalla faollari va talabalar qatnashishdi.

Tadbirdan ko‘zlangan maqsad yig‘ilganlarga tadbirkorlarning qonuniy manfaatlari davlat tomonidan himoya qilinishi va fuqarolarga sud sohasida o‘tkazilayotgan islohotlar mohiyatini tushuntirish edi. Shu kuni sayyor sud majlisi ham o‘tkazildi.

Sudya X.X.Xotamov raisligida sudlanuvchi A.Umirzaqov va S.Pirnazarovlarga nisbatan Jinoyat Kodeksining hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarning) davlat raqam belgilarini egallash, nobud qilish, ularga shikast yetkazish yoki ularni yashirish va hujjatlar, shtamplar, blankalar tayyorlash, ularni qalbakilashtirish, sotish yoki ulardan foydalanish moddalari bilan jinoyat ishi ko‘rildi.

Sud sudlanuvchilar va guvohlarning ko‘rsatmalarini eshitib, taraflarning muzokara nutqlarini, sudlanuvchining himoya va oxirgi so‘zlarini tinglab, jinoyat ishi materiallari bilan tanishib, jinoyat ishi materiallarini har tomonlama to‘la va xolisona tekshirib chiqdi.

A.Umirzaqov va S.Pirnazarovlar ushbu jinoyatni qilganlikda aybdor deb topildi. Ularga nisbatan eng kam ish haqining 20 foizini davlat daromadi hisobiga ushlab qolgan holda 2 yil muddatga ahloq tuzatish ishlari hamda 3 yil 6 oyga ozodlikni cheklash jazolari tayinlandi.

Hukmdan norozi taraflarga tegishli muddatlarda apellyatsiya yoki kassatsiya tartibida yuqori turuvchi sudga shikoyat qilish yoki protest bildirish huquqi mavjudligi tushuntirildi.