Saudiya Arabistoni Ramazonning so‘nggi 10 kunida Qatar ziyoratchilarini qabul qiladi

Saudiya Arabistoni Qatar fuqarolariga muborak Ramazon oyining so‘nggi 10 kuni davomida Umra ziyoratini amalga oshirish uchun qirollikka kirishga ruxsat berdi. 

Saudiya Arabistonining Haj va Umra ishlari bo‘yicha vazirligi tomonidan seshanba kuni taqdim etilgan bayonotga ko‘ra, Qatar fuqarolari tashrifni amalga oshirish uchun faqat rasmiy Saudiya kompaniyalari orqaligina murojaat qilishlari kerak. 

Biroq shuni ta'kidlash joizki, qatarlik ziyoratchilar qirollikka faqat charter reyslar orqali borishi mumkin, zero ikki mamlakat o‘rtasidagi to‘g‘ridan-to‘g‘ri reyslar o‘tgan yilning iyunidan to‘xtatib qo‘yilgan.

Saudiya Arabistoni agentligi ma'lumotlariga ko‘ra, arizachilar onlayn-viza olishni so‘rab murojaat qilishlari kerak, chunki hozirda Dohada Saudiya Arabistoni elchixonasi faoliyati to‘xtatilgan.

Saudiya birinchi marta qatarliklarga mamlakat hududiga kirishga izn bermoqda, zero ikki mamlakat o‘rtasidagi munosabatlar bir yil avval uzilgan.

O‘tgan yilning 6 iyunida Saudiya Arabistoni, Misr, Birlashgan Arab Amirliklari va Bahrayn Qatarni terrorchi guruhlarni qo‘llab-quvvatlashda ayblab, u bilan aloqalarni uzishgan edi.