AQSh Rossiyaning Suriyaga aloqador navbatdagi yolg‘oni haqida ma'lum qildi

Suriyada amerikalik harbiylar ishtirokida fitna tayyorlanayotgani haqidagi ma'lumot haqiqatga zid. Bu haqda AQSh Davlat departamenti rasmiy vakili Xizer Nauert ma'lum qildi.

Avvalroq, Rossiya Mudofaa vazirligi AQSh koalitsiyasi Suriyada yangi aviazarbaga tayyorgarlik ko‘rayotgani haqida xabar bergandi. Bunga kimyoviy moddalardan foydalanish to‘g‘risidagi sahnalashtirilgan rolik sabab bo‘lgan. Mahkama ma'lumotlariga ko‘ra, fitna amerikalik harbiylar ko‘magi bilan «Suriya ozodlik armiyasi» kuchlari tomonidan tayyorlanmoqda.

«Rossiya Mudofaa vazirligi AQSh va «Suriya ozodlik armiyasi» kuchlari Suriyada sahnalashtirilgan kimyoviy hujumga tayyorgarlik ko‘rayotgani haqida yolg‘on bayonotlar bermoqda», - deya yozgan Nauert tvitterda.

Uning so‘zlariga ko‘ra, Qo‘shma Shtatlar Kimyoviy qurolni taqiqlash to‘g‘risidagi konvensiyaga amal qilmoqda, Rossiya esa «Solsberida zaharlovchi moddadan foydalandi va Suriya prezidenti Bashar Asadni Suriyadagi muntazam kimyoviy hujumlar bo‘yicha ayblovlardan himoya qilmoqda».

Eslatib o‘tamiz, avvalroq Suriyaga aviazarbalar natijasida 44 kishi halok bo‘lgani, Rossiya bunga aloqador ekanini rad etayotgani haqida xabar berilgandi.