Saudiya Arabistonida qonunchilikni buzgan 1,25 milliondan ziyod kishi qo‘lga olindi

Saudiya Arabistonida Qirollik tomonidan o‘tkazilgan kampaniyada turar-joy, mehnat va chegara xizmatlari bilan bog‘liq qonunchilikni buzgan 1,25 milliondan ziyod kishi qo‘lga olindi. ArabNews shu haqida xabar berdi. 

O‘tgan yilning 16 noyabrida boshlanib, joriy yilning 14 iyunida tugagan xavfsizlik kampaniyasida 1 251 966 kishi qo‘lga olingan. Ulardan 931 069 nafari - turar-joy qonunchiligini, 218 897 kishi - mehnat qonunchiligini va 102 000 nafari chegara xavfsizlik qoidalarini buzganlikda gumonlanmoqda. 

Qirollik chegarasini kesib o‘tishga uringanlarning umumiy soni 19 233 kishini tashkil qilgan. Ularning 54 foizi yamanliklar, 43 foizi efiopiyaliklar va 3 foizi boshqa mamlakat vakillari bo‘lgan. 

Shuningdek 790 kishi Saudiya Arabistoni hududini noqonuniy tark etishga uringan. 

Mehnat qonunchiligini buzgan kishilarni yashirish va tashishda gumon qilingan 2167 kishi, qoidabuzarlarni yashirish va tashishda gumonlangan 415 kishi qo‘lga olingan. 388 kishiga nisbatan tartibga chaqirish choralari ko‘rilgan, keyinchalik ular qo‘yib yuborilgan. 

Hozirga kelib qo‘lga olinganlar soni 10 245 kishini tashkil qilmoqda. Bulardan 8817 nafari - erkak, 1428 nafari - ayol kishi. 221 404 kishiga nisbatan jarimalar kiritildi, 177 329 qoidabuzar hujjatlarni tartibga keltirishi uchun tegishli diplomatik vakolatxonalarga yo‘llandi, 327 034 nafari esa deportatsiya qilindi.