Bosh vazir tashrifidan so‘ng Samarqandning "Yevropa" qismidagi noqonuniy qurilish ishlari to‘xtatildi

Samarqand shahrining "Yevropa" qismida noqonuniy qurilayotgan ko‘p qavatli binoni buzish ishlari boshlandi. KUN.UZ manbasining xabar berishicha, hozir bu masala sud tomonidan o‘rganilib, tegishli choralar ko‘rilmoqda.

Ta'kidlash joizki, bu ishni shaxsan bosh vazir Abdulla Aripovning o‘zi borib nazoratga olmagunicha, Samarqand viloyati hokimligi tomonidan zarur qat'iy choralar ko‘rilmagan. Qurilish ishlari noqonuniy amalga oshirilayotganiga qaramasdan, viloyat hokimligi bunga nisbatan hech qanday chora ko‘rmagan. Endi bu ishni sudga oshirish orqali binoni buzish ishlari yo‘lga qo‘yilmoqda. Bunday chora-tadbirlar noqonuniy qurilish ishlarini amalga oshirmaslik uchun barchaga o‘rnak bo‘lishi shubhasiz.

23 iyun kuni O‘zbekiston Respublikasi bosh vaziri Abdulla Aripov Samarqandga tashrif buyurib, shaharning tarixiy qismida olib borilayotgan qurilish ishlari bilan tanishgani haqidagi xabar KUN.UZ'da taqdim etilgan edi. 

Aripov shaharning tarixiy qismida olib borilayotgan qurilish ishlari davomida O‘zbekistonda amal qilayotgan xalqaro hujjatlarga to‘liq rioya etilishini talab etgan. Jumladan, YuNeSKO butunjahon merosi ro‘yxatiga kirgan hududda olib borilayotgan qurilish va obodonlashtirish ishlari shaharning tarixiy binolari qiyofasini buzmasligi kerakligini qayd etgan. 

Bosh vazir yo‘l qo‘yilgan qonunbuzarliklar uchun qat'iy choralar qo‘llanilishini bildirib o‘tgan.