Trampning KXDR va Eron yadro dasturlari bo‘yicha strategiyasi haqida ma'lumot berildi

KXDR o‘z yadro poligonidagi muhim obektlarni buzishga kirishgach, AQSh prezidenti Donald Tramp Shimoliy Koreya yetakchisi Kim Chen In tomonidan Singapurdagi sammit vaqtida olingan majburiyatlarni bajarishning birinchi bosqichidagi g‘alabani erta nishonladi, deb yozmoqda The New York Times gazetasi.

Biroq, Trampning Oq uydagi maslahatchilari u Shimoliy Koreya bilan oxiri yo‘q muzokaralarga yana kirishishi mumkinligidan xavfsiramoqda. Bunda Pxenyan avval qator ramziy obektlarni buzdi, biroq o‘z yadroviy arsenalini kengaytirishda davom etdi, deb yozadi NYT.

Amerikalik sobiq diplomatlar va razvedka xizmatlari xodimlarining aytishicha, AQSh KXDRga nisbatan yumshoq munosabatda bo‘layotgani va Eronga tahdid qilishi bilan bog‘liq strategiya Donald Trampning o‘zi tomonidan qabul qilingan hamda uning yondashuviga asoslangan.

Xalqaro ishlar bo‘yicha kengash raisi va Davlat departamenti hamda Milliy xavfsizlik kengashi sobiq xodimi Richard Xaasning qayd etishicha, bunday strategiya mantiqqa ega emas.

«Tramp Eronni o‘n yil davomida yadro biznesidan tiyib turuvchi shunday paktni rad etdi, bunda Shimoliy Koreyaga yadro qurolini yillar davomida saqlash imkonini beruvchi tushunarsiz kommyunike ham chiqarildi», - degan Xaas.

NYT’ning ta'kidlashicha, Oq uy va Davlat departamenti Trampning bunday yondashuvini tushuntirib bermadi.

Materialda aytilishicha, 24 iyul kuni Missuri shtatining Kanzas-Siti shahridagi mitingda Tramp Eron va KXDR bo‘yicha yadro masalalarini o‘z muvaffaqiyati sifatida taqdim etishga uringan.

Eron bilan yadroviy bitimni u «dahshatli» va «bir tomonlama» deb atagan bo‘lsa, KXDR yetakchisi Kim Chen In bilan Singapurdagi uchrashuvni Koreya yarim orolida farovonlik, xavfsizlik hamda tinchlikka erishish bo‘yicha keng qamrovli sa'y-harakatlar sifatida ko‘rsatdi.

«Bizda Kim Chen In bilan ajoyib uchrashuv bo‘ldi, hamda, aftidan, hammasi yaxshi ketmoqda», - degandi Tramp.

Hozirgi va sobiq diplomatlar hamda razvedka xodimlarining ma'lum qilishicha, Tramp Shimoliy Koreya yetakchisini yadro qurolidan voz kechishga ishontirish uchun yagona umid - bu uni haddan tashqari maqtash, degan ishonchda yuribdi.