Bosh prokurorning yana bir o‘rinbosari bo‘ladi. U soliq va bojxona sohasi bilan shug‘ullanadi

O‘zbekiston Respublikasi prezidenti “O‘zbekiston Respublikasida amalga oshirilayotgan soliq va bojxona islohotlariga huquqiy hamrohlik qilish bo‘yicha chora-tadbirlar to‘g‘risida”gi farmonni imzoladi.

Hujjat bilan bosh prokurorning soliq va bojxona sohasida qonunchilik ijrosi ustidan nazorat qilishga mas'ul bo‘lgan o‘rinbosari lavozimi joriy etiladi.
Bunda tashqari, Qoraqalpog‘iston Respublikasi, viloyatlar va Toshkent shahri prokurorlarining shu faoliyat yo‘nalishidagi o‘rinbosarlari, tumanlar (shahar) prokurorlarining o‘rinbosarlari hamda yordamchilari ham ish boshlaydi.

Belgilanishicha, prokuratura organlarining qayta tashkil etiluvchi bo‘linmalari davlat soliq xizmatining hududiy organlari tomonidan topshiriluvchi 493 shtat birligi hisobidan shakllantiriladi.

2018 yilda davlat soliq xizmati organlarining Bosh prokuraturaga topshiriluvchi shtat birliklarini moliyalashtirish davlat byudjyeti hamda MIB rivojlanish jamg‘armasi hisobidan amalga oshiriladi.