Nurmagomedov-Makgregor jangiga chiptalar 3 daqiqadayoq sotib bo‘lindi

Rossiyalik Xabib Nurmagomedov va irlandiyalik Konor Makgregor o‘rtasida o‘tadigan jangga chiptalar savdoga chiqarilgandan 3 daqiqa ichida sotib bo‘lindi. Bu haqda KLAS-TV telekanali ma'lum qilgan.

Ushbu jangni bevosita ko‘rish istagida bo‘lganlar chiptalar uchun ming dollardan boshlab pul to‘lashlariga to‘g‘ri kelgan. Vaholanki, jang tashkilotchilari chiptalarni 300 dollardan boshlab chiqarishga va'da berishgandi.

Jang 6 oktabrda UFC 229 musobaqasi doirasida Las-Vegasda bo‘lib o‘tadi. Hozirda Nurmagomedov jangchilik faoliyatida birorta mag‘lubiyatga uchramay kelmoqda. Uning hisobida 26 ta jangda 26 ta g‘alaba bor. U yengil vaznda UFC chempioni unvoniga ega. Makgregor esa o‘rta yengil va yengil vazn toifalarida UFC’ning sobiq chempioni bo‘lib, 24 ta jangdan 21 tasida g‘alaba qozongan, 3 tasida mag‘lubiyatga uchragan.

Bungacha raqiblar o‘zaro biror marta uchrashishmagan. Nurmagomedov bo‘lib o‘tajak jang haqida fikr bildirib, raqibini kamtarlikka o‘rgatib qo‘yishini, ushbu jang u uchun nafaqat sport, balki shaxsiy masala ekanligini aytgan.