Normativ-huquqiy hujjatlar loyihalari muhokamasi portalida Toshkent viloyati hokimligining “Jamoat tartibini saqlashga oid qo‘shimcha chora-tadbirlar to‘g‘risida”gi qarori loyihasi joylashtirildi.
Hujjatda aytilishicha:
alkogolli mahsulotlar bilan chakana savdo qilish huquqini beruvchi ruxsat guvohnomalari asosida ishlovchi ixtisoslashtirilgan do‘konlar va alohida savdo zallari (seksiyalar) tomonidan alkogolli mahsulotlarni sotish mahalliy vaqt bilan soat 21:00 dan 09:00 ga qadar;
alkogolli mahsulotlarni sotish huquqi uchun ruxsat guvohnomalari mavjud umumiy ovqatlanish korxonalari, restoran, kafe, bar va tungi klublar (mehmonxonalar va mehmon uylari bundan mustasno) tomonidan mijozlarga xizmat ko‘rsatish mahalliy vaqt bilan soat 23:00 dan 09:00 ga qadar to‘xtatiladi.
Mazkur qarorning 1-bandida o‘rnatilgan qoidani buzish eng kam ish haqining bir baravaridan uch baravarigacha miqdorda jarima solishga sabab bo‘ladi.
Shunday tartib o‘rnatiladiki, unga muvofiq:
viloyat ichki ishlar organlari o‘z vakolatlari doirasida mazkur qarorning 1-bandida o‘rnatilgan qoidaga rioya etilishini tekshiradilar;
ma'muriy javobgarlikka tortish holatlari yuzasidan ma'muriy huquqbuzarlik to‘g‘risidagi bayonnomalar tuman (shahar) ichki ishlar bo‘limlari (boshqarmalari) boshliqlari yoki ularning o‘rinbosarlari tomonidan tuziladi hamda boshqa hujjatlar va ish bo‘yicha ashyoviy dalillar (foto- va videomateriallar hamda kamida ikkita xolis ishtirokida tuzilgan dalolatnoma) bilan birga o‘rnatilgan tartibda ma'muriy sudlarga huquqbuzarlik to‘g‘risidagi ishlarni ko‘rib chiqish uchun yuboriladi;
ashyoviy dalil sifatida do‘konlar, alohida savdo zallari (seksiyalar), umumiy ovqatlanish korxonalari, restoran, kafe, bar va tungi klublardan alkogolli mahsulotlar, nazorat-kassa mashinalari, bank terminallari hamda savdo-sotiq va xizmat ko‘rsatish bilan bog‘liq boshqa vositalar olib chiqilmaydi;
tadbirkorlik sub'yektini mazkur qarorga muvofiq ma'muriy javobgarlikka tortish huquqni muhofaza qiluvchi va boshqa organlar tomonidan uning faoliyatini to‘xtatib turishga asos bo‘lmaydi.
Viloyat Ichki ishlar boshqarmasi (A.Allamurodov):
vakolat doirasida mazkur qarorning 1-bandida o‘rnatilgan qoidaga rioya etilishining tekshirilishini hamda ma'muriy javobgarlikka tortish holatlari yuzasidan ma'muriy huquqbuzarlik to‘g‘risidagi bayonnomalarning tuzilishini;
tuzilgan ma'muriy huquqbuzarlik to‘g‘risidagi bayonnomani boshqa hujjatlar va ish bo‘yicha ashyoviy dalillar (foto- va videomateriallar hamda kamida ikkita xolis ishtirokida tuzilgan dalolatnoma) bilan birga huquqbuzarlik sodir etilgan yoki aniqlangan paytdan boshlab bir sutkadan kechiktirmay ma'muriy sudlarga yuborilishini ta'minlaydi.
Eslatib o‘tamiz, avvalroq foydalanuvchilar IIVning kafe va restoranlar ishini 23:00dan keyin taqiqlash haqidagi loyihasini tanqid qilishgandi.
