«O‘zbekiston havo yo‘llari» bort kuzatuvchisi lavozimiga tanlov e'lon qildi

«O‘zbekiston havo yo‘llari» Milliy aviakompaniyasi bort kuzatuvchisi lavozimiga tanlov e'lon qildi. Tanlovda 18-25 yoshdagi, o‘zbek, rus va ingliz tilida so‘zlasha oladigan, bo‘yi 162—175 santimetr bo‘lgan, bo‘yiga mos vaznga ega O‘zbekiston Respublikasi fuqarolari ishtirok etishi mumkin. 

Tanlovda qatnashish uchun arizalar 17 sentabrdan 5 oktabrgacha shanba va yakshanba kunlaridan tashqari har kuni soat 9:00dan 12:00gacha qabul qilinadi.

Bort kuzatuvchi lavozimiga nomzodlar to‘liq o‘rta, o‘rta-maxsus, kasb-hunar (akademik litsey yoki kasb-hunar kolleji) ma'lumotiga ega bo‘lishi, xorijda ta'lim olganlarning diplomlari esa O‘zbekiston Davlat test markazida nostrifikatsiya qilingan bo‘lishi lozim.

Ma'lum qilinishicha, tanlovda nomzodlarning bilimi va dunyoqarashiga alohida e'tibor qaratiladi. Ular O‘zbekiston tarixi va geografiyasini, tarixiy yodgorliklari va diqqatga sazovor maskanlarini, tarixiy va milliy qahramonlari haqida bilishlari, geografiya va jahon tarixidan xabardor bo‘lishlari lozim.

Barcha bosqichlardan muvaffaqiyatli o‘tgan qizlar milliy aviakompaniyaning Toshkent shahridagi O‘quv-mashg‘ulot markazida tahsil oladi.

Qo‘shimcha ma'lumotlar uchun 215-54-49 telefon raqamlariga qo‘ng‘iroq qilish so‘ralgan.