Mirziyoyev: «Terrorchilik tuzilmalarining MDH chegaralari yaqiniga ko‘chib o‘tish tendensiyasi kuchaymoqda»

MDH davlatlari terrorizm xavfini o‘z vaqtida va samarali qaytarish uchun o‘zaro kelishilgan, avvalo, oldindan zarba berishga qaratilgan harakatlarga tayyor turishi lozim, deya hisoblaydi O‘zbekiston prezidenti Shavkat Mirziyoyev.

Uning Dushanbe shahrida MDH davlat rahbarlari kengashi majlisida so‘zlagan nutqida ma'lum qilishicha, bugungi terrorchilik tuzilmalari katta moliyaviy resurslarga, eng yangi axborot va texnika vositalariga ega, yuqori darajada harakatchan va tezkordir. 

«Hozirgi paytda ularning Yaqin Sharqdan Afg‘onistonga, MDH chegaralari yaqiniga ko‘chib o‘tish tendensiyasi kuchaymoqda.

Mamlakatlarimiz terrorizm xavfini o‘z vaqtida va samarali qaytarish uchun o‘zaro kelishilgan, avvalo, oldindan zarba berishga qaratilgan harakatlarga tayyor turishi lozim», - dedi Mirziyoyev.

Uning ta'kidlashicha, MDH makonida yuzaga kelayotgan xavfsizlikka qarshi tahdidlarning o‘z vaqtida oldini olish uchun tahliliy va tezkor axborot bilan muntazam almashishning amaldagi mexanizmlari doirasida samarali hamkorlikni ta'minlagan holda huquqni muhofaza qilish organlari va maxsus xizmatlar faoliyatini muvofiqlashtirishni kuchaytirish muhim.

«Yoshlar o‘rtasida radikallashuv muammosi e'tiborimiz markazida bo‘lib qolishi lozim. Shu munosabat bilan ta'lim-tarbiya, ilm-ma'rifat, yosh avlodni ijtimoiy qo‘llab-quvvatlash, uning huquq va manfaatlarini himoya qilish, hayotda o‘z o‘rnini topishi uchun zarur sharoitlar yaratish borasidagi hamkorlikni kengaytirish zarur», - deya qo‘shimcha qilib o‘tdi O‘zbekiston prezidenti.

Shuningdek, uning bildirishicha, Afg‘onistonda hanuz davom etayotgan qurolli mojaro Hamdo‘stlikka a'zo mamlakatlarning aksariyati uchun umumiy tahdid bo‘lib qolmoqda. 

Uning fikricha, MDH Afg‘oniston muammosini siyosiy yo‘l bilan tezroq hal etishga qaratilgan xalqaro sa'y-harakatlarda muhim rol o‘ynashga qodir.