4 oktabr oqshomida Yevropa Ligasida 2-tur uchrashuvlari o‘tkaziladi. «Tribuna» ushbu uchrashuvlar anonsini taqdim etadi.
Nima uchun Mxitaryan «Qorabog‘» bilan o‘yinga tusha olmaydi?
Yevropa Ligasi yulduz futbolchilaridan biri bo‘lmish Genrix Mxitaryan futbolga oid bo‘lmagan sabab tufayli bugun o‘ynay olmaydi. Ushbu armanistonlik futbolchini «Arsenal» Ozarboyjondagi o‘yin uchun zayavka qilmagan. Bu arman-ozar ziddiyati tufayli xavfsizlik nuqtai nazaridan qabul qilingan qarordir. Bu holat 2015 yilda ham kuzatilgan, o‘shanda Dortmundning «Borussiya» klubi Mxitaryanni Bokuga olib kelmagandi.
Emeri Yevropa Ligasidagi eng muvaffaqiyatli murabbiy sanaladi. U «Sevilya» bilan uch marta ushbu turnirda g‘alaba qozongan. Bu sovrinlarning biri aynan Bokuda qo‘lga kiritilgandi.
London jamoasi bu shaharga 4 ming kilometr masofani uchib kelgan. Bu «Arsenal»ning yevrokuboklardagi eng uzoq safari bo‘ldi.
Yana bir statistik raqam Mesut O‘zil bilan bog‘liq. U yevrokuboklardagi yubiley - 100-o‘yinida maydonga tushishga hozirlik ko‘rmoqda.
«Milan» uchun sinov, «Chelsi» uchun chigalyozdi mashqlari
Bugun yana ikki katta klub o‘z maydonlarida o‘yin o‘tkazishadi. Birinchi turda debyutant «Dyudelanj»ni qiyinchilik bilan mag‘lub etib qaytgan Jyennaro Gatuzo jamoasi bu safar yevrokuboklarning doimiy ishtirokchisi «Olimpiakos» bilan o‘ynaydi. Gonsalo Iguain chorshanba kungi mashg‘ulotlarda ishtirok etgandi, ammo u bugun o‘yinga tushish-tushmasligi noma'lumligicha qolmoqda. Milanliklar hujumida yosh Kutrone bor, ammo murabbiy uni jismonan zo‘riqtirmaslik uchun hozir ko‘p o‘yinlarda tushirmayapti.
Guruh bosqichidagi yana bir debyutant, Vengriyaning «Vidi» klubi «Chelsi»ga muammo tug‘dirmasligi aniq. Maurisio Sarri London jamoasini yanada kuchaytirgan. Shu bilan birga, ushbu italiyalik mutaxassis o‘tgan haftada «Liverpul»ga qarshi kechgan ikki o‘yindan keyin jamoaning asosiy tarkib futbolchilariga dam berishga qaror qilishi mumkin. Bugun u maydonga Fabregas va Barklini tushirishi kutilmoqda, bu futbolchilar terma jamoalariga chaqirilishi uchun ham o‘yin amaliyotiga ega bo‘lishlari kerak. Bundan tashqari, jarohatidan forig‘ bo‘lgan Loftus-Chik o‘ynashga tayyor, birinchi turda PAOK maydonida kechgan uchrashuvda jarohatlangan Pedroning holati haqida hozircha aniq ma'lumot yo‘q.
«Marsel» va «Leyptsig» uchun xavf
O‘tgan mavsumda Yevropa Ligasi finalida o‘ynab, «Atletiko»ga yutqazgan «Marsel» bu mavsumni muvaffaqiyatli o‘tkaza olmayapti. Turnirning birinchi turida Frankfurtning «Ayntraxt» klubiga yutqazib qo‘ygan jamoaning ichki chempionatdagi holati ham yaxshi emas. Frankfurtliklar jamoasi ham bundesligada mavsumni yaxshi boshlay olmagandi, ayni vaqtga kelib Germaniya Kubogining amaldagi g‘olibi bo‘lgan jamoa asta-sekin o‘ziga kelmoqda. Rudi Garsiya jamoasida esa vaziyat butkul inqiroz holatiga kelgan - marselliklar oxirgi 4 rasmiy uchrashuvdan 3tasida mag‘lubiyatga uchrashgan, yagona g‘alaba ham ishonchli kechmagan - «Strasburg»ga qarshi o‘yinda 2 gol o‘tkazilgan va oxirgi daqiqalarda g‘alaba goli urilgan (3:2).
Kiprda «Apollon»ga qarshi kechadigan o‘yin jamoa uchun hal qiluvchi o‘yinga aylanishi mumkin. Guruhdagi ikkinchi uchrashuvda «Ayntraxt» Frankfurtda «Latsio»ni qabul qiladi. Guruh kuchli jamoalardan tarkib topgan va ko‘p ehtimolki «Marsel» xalqaro maydondagi ishtirokini bu mavsumda erta yakunlaydi.
Xuddi shunday holat Germaniyaning «Leyptsig» klubida kuzatilmoqda. O‘tgan mavsumda Chempionlar ligasida ishtirok etgan bu jamoa keyinroq Yevropa Ligasida ishtirokini davom ettirdi. Nemislar klubi bu mavsumda birinchi turda «Zaltsburg»ga o‘z uyida yutqazdi (2:3), ichki chempionatda ham jamoa yetakchilar qatorida emas (6-o‘rin). Bugun jamoa «Rusenborg» mehmoni bo‘ladi, guruhning ikkinchi o‘yinida «Zaltsburg» Avstriyada «Seltik» bilan bellashadi.
Zagreb jamoasi qanday marralarni ko‘zlagan?
Birinchi turdan keyin xulosa qilish o‘rinli emasdir, lekin birinchi turda eng katta taassurot qoldirgan jamoa Zagrebning «Dinamo»si bo‘ldi. Yevrokuboklarda katta tajribaga ega, Filipp Koku boshqaruvidagi «Fenerbahche» Zagrebda 1:4 hisobida mag‘lubiyatga uchradi va bu Yevropa Ligasining birinchi turidagi sensatsion natijaga aylandi.
Xorvatlar YeChL uchun kurashishgan, ammo pley-off bosqichida Shveytsariyaning «Yang Boyz» klubi ustun kelgandi.
Nenada Belitsa jamoasi ikkinchi turni Belgiyada «Anderlext»ga qarshi o‘tkazadi. «Fenerbahche» esa birinchi turda belgiyaliklarni mag‘lubiyatga uchratgan «Spartak» Trnava klubini mehmon qiladi.
Yevropa Ligasi
2 tur
4 oktabr, payshanba
«A» guruhi
«Bayyer» Leverkuzen —AYeK 21:55
«Tsyurix»—«Ludogorets» 21:55
«B» guruhi
«Rusenborg»—«Leyptsig» 21:55
«Zaltsburg»—«Seltik» 21:55
«C» guruhi
«Bordo»—«Kopenhagen» 21:55
«Zenit»—«Slaviya» 21:55
«D» guruhi
«Fenerbahche»—«Spartak» Trnava 21:55
«Anderlext»—«Dinamo» Zagreb 21:55
«E» guruhi
«Vorskla»—«Sporting» Lissabon 21:55
«Qorabog‘»—«Arsenal» 21:55
«F» guruhi
«Betis»—«Dyudelanj» 21:55
«Milan»—«Olimpiakos» 21:55
«G» guruhi
«Spartak» Moskva —«Vilyarreal» 00:00
«Reyndjers»—«Rapid» 00:00
«H» guruhi
«Apollon»—«Marsel» 00:00
«Ayntraxt F»—«Latsio» 00:00
«I» guruhi
«Malmyo»—«Beshiktosh» 00:00
«Sarpsborg»—«Genk» 00:00
«J» guruhi
«Krasnodar»—«Sevilya» 00:00
«Standard»—«Oqhisor» 00:00
«K» guruhi
«Astana»—«Renn» 19:50
«Yablonets»—«Dinamo Kiyev» 00:00
«L» guruhi
BATE—PAOK 00:00
«Chelsi»—«Vidi» 00:00
