The Washington Post Turkiyada yo‘qolib qolgan saudiyalik jurnalist nomidan bo‘sh sahifa e'lon qildi

The Washington Post gazetasi Turkiyada izsiz yo‘qolgan saudiyalik jurnalist Jamol Qoshiqchining nomidan bo‘sh sahifa e'lon qildi. «Yo‘qolgan ovoz» maqolasi nashrning bosma va elektron versiyalaridagi «Fikrlar» bo‘limida juma kuni paydo bo‘ldi.

Qoshiqchining navbatdagi materiali paydo bo‘lishi kerak bo‘lgan gazeta sahifalaridan birining markazida o‘quvchilar uni surati, ismi va matn joylashtirilishi kerak bo‘lgan bo‘sh joyni ko‘rishdi. Yo‘q bo‘lgan matn tagiga tahririyatning «Jamol Qoshiqchining so‘zlari yuqorida aks ettirilgan bo‘lishi kerak edi», deyilgan kichik izohi bor. Ta'kidlanishicha, seshanba kunidan beri uning taqdiri haqida hech narsa ma'lum emas.

Jurnalist 2 oktabr kunidan, Istanbuldagi Saudiya Arabistoni bosh konsulxonasiga hujjatlarni rasmiylashtirish uchun borganidan beri aloqaga chiqmayapti. O‘sha kuni uning qallig‘iga binoga kirishga ruxsat berilmagan, besh soatdan keyin erkak ketganligi haqida ma'lum qilishgan.

Kuni kecha Turkiya TIVga chaqirtirilgan Saudiya Arabistonining Turkiyadagi elchisi Valid Abdul Karim al-Xorijiy jurnalist qayerdaligi haqidagi ma'lumotga ega emasligini bildirdi. Shu bilan birga, Jamol Qoshiqchi a'zo bo‘lgan Arab OAV Turkiya uyushmasi raisi Turon Kishlakchining Demiroren agentligiga ma'lum qilishicha, Saudiya tomoni boshqa davlatlarda muxolifat vakillarini o‘g‘irlab ketish bilan shug‘ullangan. Uning so‘zlariga ko‘ra, bunday hodisalar Shveytsariya, Buyuk Britaniya va Fransiyada sodir bo‘lgan.

Qoshiqchi Ar-Riyoddagi hozirgi siyosatni tanqid qilishi bilan tanilgan. 2017 yilda u vatanidan chiqib ketib, Qo‘shma Shtatlarda joylashdi. Jurnalist muntazam ravishda The Washington Post nashriga maqolalar yozadi. Unda Saudiya Arabistondagi vaziyat va davlatning tashqi siyosati tahlil qilinadi, hukumatning muammoli tomonlari yashirilmaydi va Ar-Riyod tanqid qilinadi. Avvalroq u Saudiya Arabistonidagi Al-Watan gazetasining bosh muharriri bo‘lib ishlagan va Bahraynda joylashgan hamda saudiyalik ishbilarmonlardan biriga tegishli bo‘lgan Al-Arab telekanalini boshqargan.