«Texnoparklar to‘g‘risida»gi qonunni tayyorlashda koreyalik mutaxassislar ko‘mak beradi

Mirzo Ulugbek Innovation Center​ va Koreya texnoparklari uyushmasi hamkorlik to‘g‘risida kelishuvni imzoladilar. Hujjat mahalliy bozorda axborot-kommunikatsiya texnologiyalari va ekotizimlar startapini rivojlantirish sohasida uzoq muddatli strategik hamkorlikni amalga oshirish bo‘yicha taraflarning o‘zaro rejalarini aks ettiradi. Bu haqda markaz rasmiy vakili Kun.uz'ga xabar bergan. 

MUIC​ direktori Farhod Ibragimov va Koreya texnoparklari uyushmasi raisi Djyeyxun Li ishtirokidagi rasmiy marosim 25 oktabr kuni Tegu shahrida bo‘lib o‘tdi. Kelishuvni imzolanishi taraflarga joriy yilning iyul oyida Koreya Respublikasi texnoparklari uyushmasi vakillarining O‘zbekistonga tashrifi chog‘ida erishilgan qator shartlashuvlarni amalga oshirishga o‘tish imkonini beradi.

Xususan, gap Uyushmaning yetakchi ekspertlarini MUIC​ qoshidagi texnopark konsepsiyasini ishlab chiqish, Toshkentda uni qurish, shuningdek, texnoparkni boshqarish to‘g‘risidagi nizomni tayyorlashga jalb qilish haqida bormoqda. Koreyalik hamkorlarning texnologik tajribasi g‘oyalarni yuzaga keltiradigan, ularni ishlaydigan, tashqi bozorda raqobatbardosh mahsulotlarga aylantiradigan maydoncha va O‘zbekistonda startaplarni rivojlantirish uchun poydevor bo‘ladigan IT-infratuzilmasining universal obektini yaratishga imkon beradi. Texnopark tuzilmasida tadqiqot laboratoriyalar, R&D-markazlar, kovorking markazlari hamda innovatsion ekotizimning boshqa tarkibiy qismlari bo‘lishi nazarda tutilgan.

Imzolangan kelishuv shuningdek, MUIC​'ni mas'ul xodimlarining Koreya texnoparklarida stajirovkadan o‘tishi, O‘zbekiston Respublikasining «Texnoparklar to‘g‘risida»gi qonuni va boshqa qonunosti hujjatlarini tayyorlashda koreyalik mutaxassislarning ekspertlik ko‘magi rejalarini ham qamrab olgan.

Marosim chog‘ida MUIC​ direktori Farhod Ibragimov «O‘zbekistonda IT-parklarni rivojlanish istiqbollari» ma'ruzasi bilan chiqdi, shundan so‘ng imzolangan kelishuvda bayon etilgan rejalarni amalga oshirish bo‘yicha birgalikdagi ishlarni ancha batafsil muhokamasi bo‘lib o‘tdi.

MUIC​ va Koreya Respublikasi texnoparklari uyushmasi o‘rtasidagi hamkorlik ham tajriba almashuvini, ham qo‘shimcha resurslar safarbar etilishini jadallashtiradi. Jumladan MUIC​ va Gyonbuk texnoparki (Koreya Respublikasi texnoparklari uyushmasining a'zosi) endi birgalikda Knowledge Sharing Program (KSP)​ dasturida ishtirok etishga ariza topshirdilar, unga ko‘ra MUIC​ texnoparkini rivojlantirish bo‘yicha har ikkala tarafning birgalikdagi faoliyatiga Koreya Respublikasining hukumati tomonidan qo‘shimcha moliyalashtirish ajratilishi nazarda tutiladi.

Kelishuvning imzolanish payti Koreya Respublikasi texnoparklari uyushmasining 20 yilligini bayram qilinishiga muvofiq belgilangan.