Avstraliyada yuk poyezdi mashinistsiz o‘z holicha 100 km yo‘l bosib o‘tdi  

Avstraliya OAV ikkinchi kun baxtli tasodifgina qurbonlarsiz tugagan noodatiy favquloddagi vaziyatni muhokama qilishdan to‘xtamayapti. Voqea 5 noyabrda Nyuman shahridan Port-Xedlendga yo‘l olayotgan yuk poyezdi bilan yuz bergan.

Temir rudasi ortilgan yuk poyezdi 268 ta vagondan iborat bo‘lib, bunday ulkan tarkibni 4 ta teplovoz tortgan, bir mashinist boshqargan.

Ma'lum qilinishicha, barchasi mashinist oraliq to‘xtashlardan birida vagonlardan birini ko‘zdan kechirish uchun kabinani tark etgandan keyin boshlangan. Shu payt tarkib joyidan qo‘zg‘alib, tezlasha boshlagan va mashinist bunga qarshilik ko‘rsata olmagan. 

Poyezd qiya yuza bo‘ylab ketib qolgani yoki lokomotivlar tortishi oqibatida yurib ketgani hozircha noma'lum. Tarkib borgan sari tezlashib, mashinistsiz o‘rtacha 100 km/soat tezlik bilan deyarli 100 kmcha yo‘l o‘tgan.

Poyezdni yagona usul – relslardan chiqarib yuborish bilan to‘xtatishga muvaffaq bo‘lingan, aks holda bu voqea qanday ayanchli oqibatlarga olib kelishini tasavvur ham qilish qiyin.

Poyezdni qurbonlar bo‘lmasligi uchun sun'iy falokat yo‘li bilan cho‘l hududida to‘xtatishga muvaffaq bo‘lingan.    

Mutaxassislarning fikricha, mutasaddi idoralarda poyezdni to‘xtatish uchun boshqa chora ham qolmagan. Poyezd 14 ming kishilik Port-Xedlenddan 100 km uzoqlikda to‘xtatilgan. 

Tarkib dunyodagi eng yirik tog‘-kon kompaniyalaridan biri, bosh qarorgohi Melburnda bo‘lgan BHP kompaniyasiga tegishli bo‘lgan. 

Bloomberg’ning BHP’ga iqtibos keltirgan holda ma'lum qilishicha, falokat oqibatida 1,5 kmlik temir yo‘l qismiga shikast yetgan, uni tiklashga kamida bir hafta vaqt ketadi. Hozirda bu muammoni hal qilish bilan 130 ga yaqin odam shug‘ullanmoqda. 

Mutaxassislarning fikricha, falokat Avstraliyadan ruda eksportiga jiddiy ta'sir qiladi. Mutaxassislarning hisob-kitobiga ko‘ra, portda mavjud bo‘lgan xom ashyo zaxiralari uni yetkazishdagi ushlanishlarning o‘rnini qoplolmaydi.  

Mutaxassislarning baholashicha, xom ashyo yetkazilishi to‘xtab qolishi sababli kompaniya har kuni 55 mln dollargacha zarar ko‘radi.