Kanada yahudiy qochqinlar bilan bog‘liq 1939 yilgi noxush voqea uchun uzr so‘radi 

Kanada bosh vaziri Jastin Tryudo mamlakat parlamentining quyi palatasidagi nutqida Kanada hukumati 1939 yilda natsistlar Germaniyasidan “Sent-Luis” kemasida kelgan yahudiy qochqinlarni qabul qilishdan bosh tortgani uchun uzr so‘radi.

“Bugun men quyi palataga Kanada yuz o‘girgan yahudiy qochqinlardan kechikkan uzrni so‘rash uchun keldim. Ushbu uzrni keltirgan holda, men tariximizning bu og‘riqli bobiga oydinlik kirita olishimizga va bu saboq hech qachon unutilmasligi borasida qayg‘urishimizga umid qilaman. Davlatimizda yoki butun jahonda antisemitlik, ksenofobiya va adovatga joy yo‘qdir”, deb aytgan Tryudo. 

1939 yil mayida 930 yahudiy qochqin “Sent-Luis” kemasida natsistlar ta'qibidan qochish maqsadida Germaniyadan Kubaga yo‘l olgan. Ular Kubada xavfsiz sharoitda AQSh vizasi olishni kutib turishmoqchi bo‘lishgan. Biroq Kuba, Lotin Amerikasining bir qator davlatlari, AQSh va Kanada ularni qabul qilishni istamagan va kema Yevropaga qaytib ketgan. Kemadagilar Yevropaning boshqa davlatlarida qo‘nim topishgan. Ularni Buyuk Britaniya, Fransiya, Belgiya va Gollandiya qabul qilgan.