Fransiyaning Societe Generale banki Vashingtonning Kuba, Eron va Sudanga qarshi kiritgan sanksiyalari tartibini buzgani uchun AQShga umumiy hisobda 1,34 mlrd dollar to‘lab beradi. Bu haqda AQSh Federal zaxira tizimi ma'lum qildi.
Ma'lumotlarga ko‘ra, FZT fransuz bankini “Kubaga qarshi sanksiyalarni buzish bilan bog‘liq xavfli va asoslanmagan operatsiyalar” uchun 81,3 mln dollarlik jarimaga tortgan. Shuningdek, bank Kuba, Eron va Sudanga qarshi sanksiyalarni buzganlik uchun javobgarlikka tortilmaslik maqsadida AQSh moliya vazirligiga 53,9 mln dollar, adliya vazirligiga 717,2 mln dollar, Nyu-York shtati moliya xizmatlari departamentiga 325 mln dollar, Manxetten okrug prokurori idorasiga 162,8 mln dollar jarima to‘laydi.
AQSh 1961 yilda Kuba AQSh mulkini milliylashtirganiga javoban Gavana bilan diplomatik aloqalarni uzgan. Shundan keyin Vashington Kubaga qarshi savdo-iqtisodiy embargo kiritgan. Kuba hukumati ma'lumotlariga ko‘ra, AQSh tomonidan kiritilgan blokada sababli o‘tgan davr ichida Kuba iqtisodiyotiga 134,5 mlrd dollar zarar yetgan.
AQShning Eronga qarshi sanksiyalari 2-bosqichda: 7 avgust va 5 noyabrda tiklandi.
Sudanga qarshi 20 yildan ko‘proq vaqt amal qilgan sanksiyalar 2017 yil oktabrda bekor qilingandi. Biroq Sudan hamon terrorchilikning asosiy homiylari ro‘yxatida hisobda turadi.
