Hukumatning Farg‘ona shahri bo‘yicha qarori qabul qilinadi

Normativ-huquqiy hujjatlar loyihalar muhokamasi portalida Vazirlar Mahkamasining “Farg‘ona viloyatining Farg‘ona shahrida sanoat, xizmatlar sohasini rivojlantirish orqali aholi bandligini ta'minlashga doir qo‘shimcha chora-tadbirlar to‘g‘risida”gi qarori loyihasi joylashtirildi.

Hujjatda qayd etilishicha, respublika ishchi guruhi tomonidan mahallalarni uyma-uy o‘rganib chiqish, ijtimoiy soha obektlariga tashrif buyurish orqali Farg‘ona shahrida amalga oshirilayotgan ijtimoiy-iqtisodiy islohotlar kompleks o‘rganib chiqilgan;

Farg‘ona shahrida amalga oshirilayotgan ijtimoiy-iqtisodiy islohotlarni o‘rganish yakunlari bo‘yicha mahalla, shahar va viloyat darajalarida hal etilishi talab qilinadigan tizimli muammolar va kamchiliklarni bartaraf etishga yo‘naltirilgan “yo‘l xaritalari” ishlab chiqilganligi va tasdiqlangan;

2018-2019 yillarda Farg‘ona shahrida kafolatli ish o‘rinlari tashkil etish hamda sanoat, xizmatlar sohasi va qishloq xo‘jaligini rivojlantirish loyihalarining manzilli ro‘yxati;

2019 yilda Farg‘ona shahrida turizmni yanada rivojlantirishga qaratilgan chora-tadbirlar rejasi tasdiqlanishi mumkin.

Farg‘ona viloyati hokimligi:

O‘zbekiston Respublikasi Investitsiyalar bo‘yicha davlat qo‘mitasi, manfaatdor davlat va xo‘jalik boshqaruvi organlari, tijorat banklari, loyihalarning tashabbuskorlari bilan birgalikda tasdiqlangan manzilli ro‘yxat parametrlarining so‘zsiz bajarilishini hamda bu borada investitsiya loyihalarining o‘z vaqtida va sifatli amalga oshirilishini, ishlab chiqarishning mo‘ljallangan hajmlari o‘zlashtirilishini va yangi ish o‘rinlari tashkil etilishini ta'minlaydi;

investitsiya loyihalari bajarilishi yuzasidan tizimli monitoring olib borsin va monitoring davomida aniqlangan muammoli masalalarni muntazam ravishda ko‘rib chiqib, ularni hal etish yuzasidan tezkor va amaliy zarur chora-tadbirlarni amalga oshiradi.

Farg‘ona viloyati hokimligiga O‘zbekiston Respublikasi Investitsiyalar bo‘yicha davlat qo‘mitasi va xizmat ko‘rsatuvchi tijorat banklari bilan kelishgan holda, loyihalarning qiymatini va ish o‘rinlari sonini saqlab qolish sharti bilan loyihalarning tasdiqlangan manzilli ro‘yxatiga, zaruratga ko‘ra, qo‘shimcha va o‘zgartirishlar kiritish huquqi beriladi.

Farg‘ona viloyat hokimligi, Investitsiyalar bo‘yicha davlat qo‘mitasi, Moliya vazirligi, Maktabgacha ta'lim vazirligi maktabgacha ta'lim muassasalarini rekonstruksiya qilish ishlarini tasdiqlangan loyiha-smeta hujjatlari asosida kelgusi yillarda O‘zbekiston Respublikasining rivojlanish davlat dasturi doirasida amalga oshirilishini ta'minlaydi.

Farg‘ona viloyati hokimligining Farg‘ona shahar, A.Navoiy, ko‘chasidagi eski uy-joylar o‘rnida zamonaviy turar joylar va mehmonxona kompleksini barpo etish to‘g‘risidagi taklifi ma'qullanadi.

Farg‘ona viloyati hokimligi, O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi, Qurilish vazirligi va boshqa manfaatdor vazirlik va idoralar bilan hamkorlikda mahalliy va xorijiy investorlar ishtirokida mazkur kompleks qurilishini belgilangan tartibda shaharsozlik normalari va qoidalari asosida amalga oshirilishini ta'minlaydi.

Farg‘ona viloyati hokimi, tegishli sektorlar rahbarlari Farg‘ona viloyati Farg‘ona shahrida ijtimoiy-iqtisodiy islohotlar amalga oshirilishini kompleks o‘rganish natijasi bo‘yicha tasdiqlangan “yo‘l xaritalari” bajarilishini ta'minlaydi.