​O‘zbekistonda yo‘ldosh gazlardan elektr energiyasi ishlab chiqarilmoqda

O‘zbekistonda yo‘ldosh gazlardan elektr energiya ishlab chiqarish usuli qo‘llanilmoqda. Bu haqda «O‘zneftgazqazibchiqarish» AJ Uglevodorodlarni qazib chiqarish va gazni qayta ishlashni muvofiqlashtirish boshqarmasi boshlig‘i o‘rinbosari Shavkat Ulug‘ov ma'lum qildi. 

«Elektr energiya ishlab chiqarish bo‘yicha Qashqadaryoda bir nechta loyihalar amalga oshiryapti. Bulardan Qoratepa, Sarbon konlarida yo‘ldosh gazlardan elektr energiya ishlab chiqarish yo‘lga qo‘yilgan. Shu bilan birga, havoga chiqarilayotgan gazlar qayta ishlanmoqda», - deydi boshqarma boshlig‘i o‘rinbosari. 

«O‘zbekneftgaz» AJ boshqaruv raisining o‘rinbosari Odil Temirovning aytishicha, O‘zbekiston boy uglevodorodlar zaxirasiga ega va bu kelajakda uzoq yillik loyihalarni amalga oshirish imkoniyatini beradi. Markaziy Osiyodagi uglevodorod zaxiralarining 1/3 qismi O‘zbekiston hududida joylashgan. 

«Hozirgi, asosiy maqsadlarimizdan biri - uglevodorodni chuqur qayta ishlab, undan yuqori qo‘shilgan qiymatli mahsulotlar ishlab chiqarish va eksport salohiyatini kengaytirish uchun investitsiyalarni jalb etish», - deydi u. 

Ma'lum qilinishicha, 2018 yilda O‘zbekistonda tabiiy gaz qazib olish hajmi 61 mlrd kubometrni tashkil etishi kutilmoqda. Bu 2017 yilga nisbatan 5,2 mlrd.ga ko‘pdir. Mineral-xomashyo bazasini rivojlantirish va takror ishlab chiqarish dasturini amalga oshirish boshlanganidan buyon (2017 yil va 2018 yilning 10 oyi) uglevodorodning sanoat oqimlari olinadigan 10ta yangi neft va gaz koni ochildi. 

Bu yil kompaniya 14ta investitsiya loyihasini amalga oshirmoqda. Xususan, Buxoro viloyatida «LUKOYL» (Rossiya) bilan hamkorlikda gazni qayta ishlash zavodi kompleksi qurilishi va Qandim konlar guruhini rivojlantirish ishlari tugallandi.