Kubada milliy miqyosdagi blekaut yuz berdi

Kubada elektr energiyasi to‘liq o‘chib qoldi, deb xabar qildi davlat elektr tarmoqlari operatori UNE 16 mart, dushanba kuni. Shu tariqa orolning barcha aholisi — taxminan 10 million kishi elektr ta’minotisiz qolgan.

«Hozirgi vaqtda elektr ta’minotini tiklash choralari ko‘rilmoqda», — deyiladi UNE kompaniyasining X mikroblogida. Shu bilan birga, Reuters agentligi eslatishicha, Kubadagi hozirgi blekautdan oldin ham elektr energiyasi o‘chishining butun boshli qator holatlari kuzatilgan. Ayrim holatlarda kubaliklar bir necha sutka davomida elektr ta’minotisiz qolgan.

Shu vaziyat fonida 14 va 15 mart kunlari, ya’ni dam olish kunlarida, mamlakatda norozilik namoyishlari bo‘lib o‘tdi, ular ayrim joylarda ko‘cha tartibsizliklariga aylandi. Masalan, 14 martga o‘tar kechasi namoyishchilar guruhi Moron shahridagi hukmron Kommunistik partiya qarorgohiga hujum qildi.

Kubadagi iqtisodiy va energetika inqirozi AQSh tomonidan qo‘llangan neft blokadasi sababli ancha kuchaydi. Orolning energiya ta’minoti asosan eskirgan neft elektr stansiyalari hisobidan amalga oshiriladi. Yaqin vaqtgacha Kubaga neft yetkazib beruvchi asosiy davlat Venesuela edi. Biroq joriy yil yanvar oyida AQShning ushbu mamlakatga hujum qilishi va uning rahbari Nikolas Maduroni qo‘lga olishi ortidan Karakas kubaliklarga neft yetkazib berishni to‘xtatdi.

Bundan tashqari, Reuters agentligi eslatishicha, Vashington Kubaga neft sotadigan davlatlarga nisbatan oshirilgan bojlar joriy etish bilan tahdid qilgan. AQSh prezidenti Donald Tramp ham Kuba Eron bilan urush va Nikolas Maduroni ag‘darishdan keyin uning kun tartibidagi navbatdagi masala bo‘lishini aytgan.

Kuba prezidenti Migel Dias-Kanel fevral boshida AQSh blokadasini «jinoiy va genotsid sodir etishga qaratilgan» deb qoralagan edi. Ammo 13 mart kuni u kuchayib borayotgan energetika inqirozi sharoitida AQSh bilan muzokaralar boshlanganini ma’lum qildi va shu bilan bu aloqalarni birinchi marta rasman tan oldi.

The New York Times gazetasi 16 aprel kuni xabar berishicha, Donald Tramp o‘sha kuni jurnalistlar bilan muloqot chog‘ida «Kubani qo‘lga kiritish sharafi» unga nasib etishi mumkin, degan fikrni bildirgan.

«Kubani qo‘lga kiritish. Ya’ni, uni ozod qilish, egallashni nazarda tutyapman. O‘ylashimcha, u bilan xohlagan ishimni qila olaman. Hozir bu juda zaiflashgan mamlakat», — deya nashr Oq uy rahbarining so‘zlarini keltiradi.

16 mart kuni ertalab e’lon qilingan NBC News telekanaliga bergan intervyusida Kuba bosh vazirining o‘rinbosari Oskar Peres-Oliva «Kuba AQSh kompaniyalari, shuningdek AQShda yashovchi kubaliklar va ularning avlodlari bilan moslashuvchan savdo munosabatlariga tayyor», deb ta’kidlagan.