O‘zbekiston prezidenti Shavkat Mirziyoyev rasmiy bayram va dam olish kunlarida O‘zbekistonda ichki turizmni rivojlantirish, fuqarolarning munosib hordiq chiqarishlariga imkoniyat taqdim etish maqsadida «2019 yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida»gi Farmonni imzoladi.

Ushbu farmonning ijrosini ta'minlashda «O‘zbekiston temir yo‘llari» AJning yo‘lovchi tashish xizmati 2018 yil 30 dekabrdan 2019 yil 3 yanvargacha mahalliy va tezyurar Afrosiyob poyezdlari chiptalariga chegirmalar joriy qilgani haqida e'lon qilgan edi. Unga ko‘ra,

- pensionerlar, nogironlar, 1941-1945 yillardagi urush qatnashchilari va ularga tenglashtirilgan fuqarolar uchun (ma'lumotnoma, guvohnoma taqdim etilgan holda) – 50 foiz;

- oliy o‘quv yurti talabalariga (guvohnoma taqdim etilgan holda) – 50 foiz;

- oilaviy (ikki yoki undan ortiq kishi - eri va rafiqasi, eri yoki rafiqasi hamda 18 yoshgacha bo‘lgan farzandlari, 18 yoshga to‘lmagan farzand ota yoki onasi bilan birga bo‘lganda, nikoh guvohnomasi va qarindoshlikni belgilovchi hujjatlar nusxasi taqdim etilgan holda) – 30 foiz;

- jamoa bo‘lib sayohatga chiqqan korxona va tashkilotlar xodimlariga (4 kishi va undan ortiq korporativ buyurtma berilganda), maktab, kollej va litsey o‘quvchilariga – 20 foizgacha chegirmalar belgilandi.

Bularning barchasi yaxshi albatta. Kun.uz tahririyati esa, temir yo‘l kassalarida chiptalarni xarid qilishda muammolar mavjudmi, degan savolga javob topish maqsadida o‘z o‘rganishini olib bordi. Shu munosabat bilan Toshkent, Samarqand va Andijon shaharlaridagi temir yo‘l kassalari faoliyati bir kunda, bir vaqtning o‘zida o‘rganildi, chipta xarid qilgan fuqarolardan intervyular olindi.

Video: Youtube

Video: Mover (tas-ix)

O‘rganishlarimiz natijasidan kelib chiqib aytish mumkinki, ayni kunlarda, kassalarda chipta xarid qilish bilan bog‘liq biror muammo ko‘zga tashlanmadi. Chipta xarid qilish uchun kelgan mijozlar o‘zlari istagan kunga chipta sotib olish imkoni mavjudligini e'tirof etishdi.