O‘zbekistonda yana xususiy tashkilotlarning qo‘riqlash faoliyati bilan shug‘ullanishiga ruxsat beriladi

O‘zbekistonda yana xususiy qo‘riqlash agentliklari paydo bo‘ladi. Bu prezident qarori bilan tasdiqlangan, 2019 yilda O‘zbekiston Respublikasida jamoat xavfsizligini ta'minlash samaradorligini oshirish bo‘yicha “Yo‘l xaritasi”da nazarda tutilgan.

Xususiy qo‘riqlash agentliklari 2014 yilning 1 fevraligacha O‘zbekistonda faoliyat yuritib kelgan - o‘shandan buyon faqat Ichki ishlar vazirligi huzuridagi «Qo‘riqlash» birlashmasi qo‘riqlash faoliyati bilan shug‘ullanadi, u shartnoma asosida kompaniyalarga xizmat ko‘rsatadi.

“Yo‘l xaritasi”da jamoat xavfsizligini ta'minlash samaradorligini oshirish bo‘yicha quyidagicha tadbirlarning amalga oshirilishi belgilangan:

qo‘riqlash faoliyati bilan shug‘ullanishni yanada takomillashtirish bo‘yicha choralar ko‘rish, xususan, nodavlat tashkilotlarga xavfsizlikni ta'minlash bo‘yicha qo‘riqlash faoliyatiga va xizmatlar ko‘rsatishga ruxsat berish;

ichki ishlar organlarining yo‘l-patrul bo‘linmalari xodimlari uchun mobil videokameralar hamda ma'muriy huquqbuzarlikka oid ishlarni rasmiylashtirish va ko‘rib chiqishning elektron tizimi planshetlarini xarid qilish;

alkogoldan o‘tkir mastlik holatida bo‘lib, o‘zining harakatlari bilan huquq-tartibotga xavf tug‘diruvchi shaxslarni vaqtincha izolyatsiyalash va reabilitatsiya qilish uchun har bir tuman (shahar) sog‘liqni saqlash muassasalarida alohida xonalar (hushyorxona) ajratish.