Vazirlar Mahkamasining 2026-yil 18-avgustdagi 447-son qarori bilan muayyan yashash joyiga ega bo‘lmagan shaxslarni Vaqtinchalik boshpana va ijtimoiy tiklanish markazlariga joylashtirish bo‘yicha davlat xizmatini ko‘rsatishning ma’muriy reglamenti tasdiqlandi.
Hujjatga muvofiq, muayyan yashash joyiga ega bo‘lmagan shaxslar Vaqtinchalik boshpana va ijtimoiy tiklanish markazlariga joylashtiriladi. Markazlarda ularga ijtimoiy, huquqiy, tibbiy va boshqa turdagi yordamlar ko‘rsatilishi nazarda tutilgan.
Muayyan yashash joyiga ega bo‘lmagan shaxslar dastlab yetti kalendar kun ichida o‘rganiladi. O‘rganish natijasi bo‘yicha ularni muayyan yashash joyiga ega bo‘lmagan shaxs deb topish yoki rad etish to‘g‘risida xulosa rasmiylashtiriladi.
Shaxsning ehtiyojlaridan kelib chiqib, unga individual tartibda ijtimoiy xizmatlar va yordamlar ko‘rsatish rejasi ishlab chiqiladi. Shuningdek, markazning ijtimoiy xodimlari «Inson» ijtimoiy xizmatlar markazi bilan hamkorlikda shaxsni ijtimoiylashtirish va uning jamiyatga qayta moslashishiga ko‘maklashadi.
Markazga qabul qilingan shaxslar zaruratga qarab tibbiy ko‘rikdan o‘tkaziladi. Agar ularda shoshilinch tibbiy yordam talab qiladigan holat aniqlansa, tez tibbiy yordam brigadasi chaqiriladi. Yuqumli kasalliklarga gumon qilingan hollarda esa shaxs tegishli tibbiyot muassasasiga yuboriladi.
Shuningdek, shaxsning F.I.Sh., tug‘ilgan sanasi, doimiy yoki vaqtinchalik yashash joyi, shaxsini tasdiqlovchi hujjatlari va boshqa ma’lumotlari aniqlanadi. Shaxsni identifikatsiya qilish zamonaviy vositalar, jumladan Face-ID, daktiloskopiya va biometrik ma’lumotlar orqali amalga oshirilishi mumkin.
Markazda qolish muddati shaxsning holati va ijtimoiylashtirish jarayoniga qarab belgilanadi. Hujjatda ayrim toifadagi shaxslarni oilasiga qaytarish, tibbiyot yoki ijtimoiy muassasalarga joylashtirish, ish bilan ta’minlash va kasbga o‘qitish choralarini ko‘rish ham nazarda tutilgan.
Qarorga muvofiq, 2026-yil 1 sentyabrga qadar markazlarning ichki tartib-qoidalari tasdiqlanishi, xodimlar faoliyati samaradorligini baholash mezonlari ishlab chiqilishi va markazlar zamonaviy kompyuter hamda internet aloqasi bilan ta’minlanishi belgilangan.
Shuningdek, 2026-yil 1 oktyabrga qadar markazlar rahbarlari va barcha xodimlarining muayyan yashash joyiga ega bo‘lmagan shaxslarni ijtimoiylashtirish hamda ularga ijtimoiy xizmatlar ko‘rsatish bo‘yicha malakasini oshirish ko‘zda tutilgan. 2027-yil 1-iyulga qadar esa markazlarning sanitariya va qurilish me’yorlariga muvofiqligi xatlovdan o‘tkazilishi belgilangan.
Bundan tashqari, 2026-yil 7 sentyabrdan boshlab muayyan yashash joyiga ega bo‘lmagan shaxslarni markazga joylashtirish, ularni muayyan yashash joyiga ega bo‘lmagan shaxs deb e’tirof etish tartib-taomillarini amalga oshirish uchun «Yagona milliy ijtimoiy himoya» axborot tizimida alohida axborot modulini ishga tushirish belgilangan.
