Klasterlar faoliyatini rivojlantirish bo‘yicha ishchi guruhi tasdiqlanadi

Normativ-huquqiy hujjatlar loyihalari muhokamasi portalida Vazirlar Mahkamasining “Qishloq xo‘jaligi klasterlari hamda paxta-to‘qimachilik ishlab chiqarish tashkilotlari faoliyatini yanada rivojlantirish chora-tadbirlari to‘g‘risida”gi qarori loyihasi joylashtirildi.

Hujjat bilan paxta, g‘alla, meva-sabzavot va boshqa yo‘nalishlardagi klasterlar faoliyatini har tomonlama rivojlantirish bo‘yicha Ishchi guruhi tasdiqlanishi mumkin.

Ishchi guruh 2019 yil 1 iyungacha klasterlar faoliyatini har tomonlama rivojlantirish va ular faoliyatini to‘g‘ri tashkil etishni nazarda tutuvchi qaror loyihasini tayyorlab O‘zbekiston Respublikasi Vazirlar Mahkamasiga taqdim etadi. Bunda:

klaster tizimida mavjud to‘siqlarni bartaraf etish choralarini ko‘rish;

klasterlar faoliyatining tashkiliy-huquqiy va iqtisodiy asoslari, ularni qo‘llab-quvvatlash mexanizmlarini joriy etish;

qishloq xo‘jaligining barcha sohalarida klaster usulini keng tatbiq etish choralarini belgilash;

klasterlarni kreditlash tizimini soddalashtirish, yer ajratish bilan bog‘liq tartiblarni takomillashtirish;

paxtachilik, bog‘dorchilik, uzumchilik, sabzavotchilik, chorvachilik, parrandachilik va baliqchilikda yangi klasterlarni tashkil etish nazarda tutiladi.

Qishloq xo‘jaligi vazirligi, “O‘zpaxtasanoat” AJ hamda Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda:

klasterlarga ajratiladigan paxta ekin maydonlari konturlarini yiriklashtirish orqali yoqilg‘i moylash materiallari hamda texnika xarajatlarini qisqartirish;

klasterlar tomonidan ekin maydonlari unumdorligini oshirishga qaratilgan tadbirlarni bajarishda ularga ajratilgan, biroq g‘o‘za joylashtirilmagan yer maydonlarining reja ko‘rsatkichlarini boshqa paxta xomashyosi yetishtiruvchi qishloq xo‘jaligi korxonalariga taqsimlash yuzasidan asoslangan takliflarni kiritadi.

O‘zbekiston Respublikasi Qishloq xo‘jaligi vazirligi, “Davergeodezkadastr” qo‘mitasi, Qoraqalpog‘iston Respublikasi Vazirlar Kengashi, viloyatlar hokimliklari bilan birgalikda klasterlarga ajratiladigan ekin maydonlarini inventarizatsiya qilib, ularga yer maydonlarini to‘liq ajratilishini ta'minlaydi, zaruratga qarab boshqa tutash tumanlardan yer ajratish masalasini o‘rganib, natijalari bo‘yicha taklif tayyorlaydi va Vazirlar Mahkamasiga taqdim etadi.

O‘zbekiston Respublikasi Markaziy banki tijorat banklari tomonidan chet el liniyalari hisobidan ishlatilmay qolgan valuta mablag‘larini mineral o‘g‘itlar importi uchun klasterlarga vaqtincha (xorijiy valutada qaytarish sharti bilan) ajratish choralarini ko‘radi.

Bunda xorijiy valutadagi kredit mablag‘larini Qishloq xo‘jaligini davlat tomonidan qo‘llab-quvvatlash jamg‘armasi tomonidan agrotexnologik kartalar doirasida mineral o‘g‘itlar uchun ajratiladigan mablag‘lar hisobidan qaytarilishi nazarda tutiladi.

O‘zbekiston Respublikasi Suv xo‘jaligi vazirligi, “O‘zbekenergo” AJ hamda Qoraqalpog‘iston Respublikasi Vazirlar Kengashi va viloyatlar hokimliklari 2019 yil 1 martgacha paxta xomashyosini yetishtirish davrida suv bilan uzluksiz ta'minlash maqsadida nasos stansiyalari boshqarmalari va suv ta'minotchilari o‘rtasida (aniq vaqti va elektr energiyasi sarfini ko‘rsatgan xolda) suvni yetkazib berish grafiklarini tasdiqlaydilar.

Paxta, g‘alla, meva-sabzavot va boshqa yo‘nalishlardagi klasterlar faoliyatini har tomonlama rivojlantirish bo‘yicha Ishchi guruhi tarkibi

1.  B. Yusupov - Qishloq xo‘jaligi vaziri, Ishchi guruhi rahbari
2.  R. Gulyamov - Iqtisodiyot va sanoat vazirining birinchi o‘rinbosari, Ishchi guruhi rahbarining o‘rinbosari
3.  Sh. Hamrayev - Suv xo‘jaligi vaziri
4.  I. Abduraxmonov - Innovatsion rivojlanish vaziri
5. A. Abdullayev - “Davergeodezkadastr” qo‘mitasi raisi
6. M. Nurmuratov - Markaziy bank raisi
7.  A. Karimov - Moliya vaziri o‘rinbosari
8. R. Mamatqulov - “Agrobank” ATB raisi
9. I. Xaydarov - “O‘zto‘qimachiliksanoat” uyushmasi raisi
10. S. Xolxo‘jayev - “O‘zagrosug‘urta ” AJ raisi
11. S. Ro‘ziyev - O‘zbekiston Respublikasi Bosh prokuraturasi huzuridagi Agrosanoat majmui va oziq-ovqat xavfsizligi ta'minlanishi ustidan nazorat qilish inspeksiyasi
12. F. Pulatov - “O‘zdonmahsulot” AK raisi
13. A. Maqsudov - “O‘zpaxtasanoat” uyushmasi raisi
14. T. Jalilov - “O‘zbekoziqovqatxolding” XK raisi
15. O. Mustafoyev - “O‘zsharobsanoat” AJ raisi
16. U. Mustafoyev - “O‘zbekenergo” AJ raisi
17. F.Ibragimov - O‘zbekiston respublika tovar-xomashyo birjasi raisi
18. Ya. Abdurazzoqov - “Parrandasanoat” uyushmasi raisi
19. O. Musayev - “Baliqsanoat” uyushmasi raisi
20. lavozimi bo‘yicha - Qishloq xo‘jaligi vazirligi boshqarma boshlig‘i, Ishchi guruhi kotibi