Oliy ta’lim, fan va innovatsiyalar vazirligi tomonidan “Oliy ta’lim tashkilotlarida talabalar bilimini baholash va nazorat qilish tartibini takomillashtirish to‘g‘risida”gi qaror loyihasi jamoatchilik muhokamasiga qo‘yildi.
Loyihaga ko‘ra, 2026/2027 o‘quv yilidan boshlab yakuniy nazorat imtihonlarini ovozli va video kuzatuv kameralari bilan jihozlangan auditoriyalarda o‘tkazish tizimi joriy etiladi.
O‘tkaziladigan yakuniy nazorat turlarini keng jamoatchilik uchun oliy ta’lim tashkilotlarining rasmiy veb-saytidagi havola orqali bevosita onlayn kuzatish imkoniyati yaratiladi.
Yakuniy nazorat imtihonlari savollarini shakllantirishda talaba bilim va ko‘nikmalarini chuqur tahlil qilish imkonini beruvchi yozma topshiriqlarning aniq mezonlari ishlab chiqilishi hamda professor-o‘qituvchilar tomonidan baholashda izoh yozish tizimi joriy etilishi ta’minlanadi.
Shuningdek, loyihaga “Oliy ta’lim tashkilotlarida talabalar bilimini baholash va nazorat qilish tartibi to‘g‘risidagi nizom ilova qilingan bo‘lib, u oliy ta’lim tashkilotlarining bakalavriat ta’lim yo‘nalishi hamda magistratura mutaxassisligiga qabul qilingan talabalarning bilimini baholash va nazorat qilish tartibini belgilaydi.
Loyiha muhokamasi 12 avgustga qadar davom etadi.
