Qayd etilishicha, loyihada sayyohlarning hayoti, sog‘lig‘i va xavfsizligini ta’minlash ustuvorligi, hududlarning tabiiy-geografik salohiyatidan to‘liq foydalanish asosida turistik xizmatlarni diversifikatsiya qilish, xalqaro va milliy xavfsizlik standartlarini joriy etish, sohadagi ruxsat berish tartib-taomillarini bosqichma-bosqich raqamlashtirish va yengillashtirish, malakali yo‘riqchi-yo‘l boshlovchilarni tayyorlash tizimini takomillashtirish hamda tadbirkorlik sub’yektlari va notijorat tashkilotlarni qo‘llab-quvvatlash kabi yo‘nalishlarga urg‘u qaratilgan.
Faol turizm salohiyati yuqori bo‘lgan 162 ta tabiiy ob’yekt ro‘yxati shakllantirildi. Ular 5 ta hudud - Toshkent (77 ta), Surxondaryo (30 ta), Samarqand (22 ta), Qashqadaryo (20 ta) va Jizzax (13 ta) viloyatlari kesimida guruhlangan.
Ro‘yxatga 88 ta tog‘ va tog‘ tizmasi, 21 ta ko‘l, 20 ta sharshara, 18 ta g‘or va grot hamda 15 ta cho‘qqi kiritilgan. Har bir ob’yekt bo‘yicha uning turi, joylashgan tumani va geografik bog‘lanishi aniqlashtirilgan.
