Paxta xomashyosi ishlab chiqaruvchilarining qator xarajatlari qoplab beriladi

Normativ-huquqiy hujjatlar loyihalari muhokamasi portalida Vazirlar Mahkamasining “Paxta xomashyosi ishlab chiqaruvchilarning tomchilatib sug‘orish texnologiyasini joriy qilish bilan bog‘liq xarajatlarini qoplab berish tartibi to‘g‘risidagi nizomni tasdiqlash haqida”gi qarori loyihasi joylashtirildi.

Hujjat bilan paxta xomashyosini ishlab chiqaruvchilarning tomchilatib sug‘orish texnologiyasini joriy qilish bilan bog‘liq xarajatlarni qoplash uchun O‘zbekiston Respublikasi Davlat budjetidan subsidiyalar ajratish tartibi to‘g‘risidagi Nizom tasdiqlanishi mumkin.

Nizom 2019 yil 1 apreldan kuchga kiritiladi.

O‘zbekiston fermer, dehqon va tomorqa yer egalari kengashi “O‘zto‘qimachiliksanoat” uyushmasi, hamda Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda har yili 1 mayga qadar kelgusi yilda g‘o‘za yetishtirishda tomchilatib sug‘orish texnologiyasini joriy etish bo‘yicha loyihalar xarajatlari hisob-kitobi prognoz ko‘rsatkichlarini O‘zbekiston Respublikasi Davlat budjetidan qoplash bo‘yicha asoslangan talabnomalarni O‘zbekiston Respublikasi Qishloq xo‘jaligi vazirligiga taqdim qiladilar.

O‘zbekiston Respublikasi Qishloq xo‘jaligi vazirligi tegishli vazirliklar, idoralar hamda Qoraqalpog‘iston Respublikasi Vazirlar Kengashi va viloyatlar hokimliklari tomonidan g‘o‘za yetishtirishda tomchilatib sug‘orish tizimini joriy etish bo‘yicha hisob kitoblarning asoslanganligini o‘rganib chiqib kerakli mablag‘lar ajratish uchun Suv xo‘jaligi vazirligi bilan kelishgan holda asoslangan hisob kitoblarni 2019 yilning 1 apreligacha va keyingi yillarda kalendar yilning 1 iyunigacha Moliya vazirligiga taqdim etib borilishini ta'minlaydi.

O‘zbekiston Respublikasi Moliya vazirligi 2019 yilda Qishloq xo‘jaligi vazirligi tomonidan taqdim etilgan hisob-kitoblarga asosan paxta xomashyosini ishlab chiqaruvchilarning tomchilatib sug‘orish texnologiyasini joriy qilish bilan bog‘liq xarajatlarini qoplash uchun zarur mablag‘larni hosildorligi past bo‘lgan yerlarda davlat ehtiyojlari uchun paxta xomashyosi yetishtiruvchi qishloq xo‘jaligi korxonalarini moliyaviy qo‘llab-quvvatlash mablag‘lari hisobidan ajratilishini ta'minlasin hamda kelgusida Davlat budjeti parametrlarini shakllantirishda shu maqsadlarga mablag‘ ajratilishini ko‘zda tutib boradi.

O‘zbekiston Respublikasi Qishloq xo‘jaligi vazirligi, Suv xo‘jaligi vazirligi va Moliya vazirligi 2019 yilda tomchilatib sug‘orish texnologiyasini joriy etish tajribasi yakunlarini o‘rganib chiqib zarur holda 2020 yil 1 aprelga qadar paxta xomashyosi ishlab chiqaruvchilarning tomchilatib sug‘orish texnologiyasini joriy qilish bilan bog‘liq xarajatlarni O‘zbekiston Respublikasi Davlat budjetidan qoplab berish tartibini takomillashtirish bo‘yicha O‘zbekiston Respublikasi Vazirlar Mahkamasiga taklif kiritadi.

Nizomga ko‘ra, u paxta xomashyosini yetishtirishda tomchilatib sug‘orish texnologiyasini joriy qilmagan ishlab chiqaruvchilarga nisbatan tatbiq etilmaydi.

Tomchilatib sug‘orish texnologiyalarini joriy etish bilan bog‘liq xarajatlarning umumiy summasidan qatiy nazar, texnologiyalar joriy etilgan maydonning har bir gektari uchun bir martalik 8 mln.so‘mdan O‘zbekiston Respublikasi Davlat budjetidan subsidiyalar ajratiladi.

Davlat budjetidan ajratiladigan mazkur subsidiya mablag‘lari birinchi navbatda loyiha tashabbuskorlarining tomchilatib sug‘orish texnologiyalarini joriy etish uchun olgan kreditlarini qoplashga (mavjud bo‘lsa) yo‘naltiriladi.

O‘zbekiston fermer, dehqon xo‘jaliklari va tomorqa yer egalari kengashi, “O‘zto‘qimachiliksanoat” uyushmasi hamda Qoraqalpog‘iston Respublikasi Vazirlar Kengashi va viloyat hokimliklari bilan birgalikda har yili 1 martga qadar kelgusi yilda g‘o‘za yetishtirishda tomchilatib sug‘orish texnologiyalarini joriy etish bo‘yicha loyihalarni amalga oshirish istagini bildirgan paxta xomashyosi ishlab chiqaruvchilarning ro‘yxatini shakllantiradi.

Tomchilatib sug‘orish texnologiyasini joriy etish bo‘yicha loyihalarda paxta xomashyosi ishlab chiqaruvchilarning nomlari, ularning joylashgan manzili, tomchilatib sug‘orish texnologiyasi joriy etiladigan yer maydoni parametrlari, qurilishning dastlabki qiymati (texnik-iqtisodiy hisob-kitoblar, butlovchi qismlarni montaj qilish tadbirlariga sarflangan xarajatlar va boshqalar) hamda moliyalashtirish manbalari (o‘z mablag‘lari, kredit mablag‘lari) aks ettiriladi.

Tomchilatib sug‘orish texnologiyasini joriy etish hududiy Dasturi Qoraqalpog‘iston Respublikasi Vazirlar Kengashi Raisi va viloyatlar hokimlarining rahbarligidagi suvni tejaydigan sug‘orish texnologiyalarining joriy etishga ko‘maklashuvchi ishchi guruhlari tomonidan shakllantiriladi va tasdiqlanadi. Bunda, Ishchi guruhlar loyiha tashabbuskorlarining murojaatlariga ko‘ra tasdiqlangan Dasturlarni keyingi moliya yilida qayta ko‘rib chiqishi mumkin.

Ishchi guruhlar tomonidan tasdiqlangan tegishli Dasturlar ijrosi monitoring qilinadi va ular bo‘yicha ma'lumotlar hisobot choragidan keyingi oyning 25 sanasiga qadar Qishloq xo‘jaligi vazirligiga taqdim etiladi.

Ishchi guruhlar tomonidan tasdiqlangan Dastur va unga kiritilgan o‘zgartirishlar O‘zbekiston Respublikasi Qishloq xo‘jaligi vazirligiga taqdim qilinadi. Qishloq xo‘jaligi vazirligi tomonidan taqdim etilgan Dasturlar o‘rganib chiqiladi va umumlashtiradi hamda Suv xo‘jaligi vazirligi bilan kelishgan holda har yili 1 iyulga qadar O‘zbekiston Respublikasi Vazirlar Mahkamasining Qishloq va Suv xo‘jaligi, qishloq xo‘jaligi va oziq-ovqat mahsulotlarini qayta ishlash masalalari axborot-tahlil departamenti, Vazirlar Mahkamasi huzuridagi Tadbirkorlik faoliyatini rivojlantirishni qo‘llab-quvvatlash davlat jamg‘armasi hamda O‘zbekiston Respublikasi Moliya vazirligiga taqdim etadi.

O‘zbekiston Respublikasi Moliya vazirligi Qishloq xo‘jaligi va Suv xo‘jaligi vazirliklari tomonidan taqdim etilgan umumlashtirilgan Dasturga muvofiq aniqlangan xarajatlarni O‘zbekiston Respublikasi Davlat budjeti parametrlarini shakllantirishda hisobga oladi.

Tomchilatib sug‘orish texnologiyalarini joriy etish bilan bog‘liq xarajatlarning bir qismini qoplash uchun ajratilgan Davlat budjeti mablag‘lari hisobi O‘zbekiston Respublikasi Moliya vazirligi tomonidan O‘zbekiston Respublikasi Qishloq xo‘jaligi vazirligi uchun ochiladigan alohida shaxsiy g‘azna hisob varag‘ida yuritiladi. Bunda, moliyaviy yil yakuni bilan mazkur shaxsiy g‘azna hisob-varag‘ida foydalanilmay qolgan budjet mablag‘lari O‘zbekiston Respublikasi respublika budjetiga qaytariladi.

Loyiha tashabbuskorlari tomchilatib sug‘orish texnologiyalari joriy etilganligini tasdiqlovchi, bajarilgan ishlar va xizmatlarni topshirish – qabul qilish dalolatnomalari, hisob-fakturalar, yetkazib beruvchi, ishlar bajaruvchi korxonalar bilan tuzilgan shartnomalar nusxalari va boshqa tegishli hujjatlarni tuman qishloq xo‘jaligi bo‘limlariga ko‘rib chiqish uchun taqdim etadi.

Tuman qishloq xo‘jaligi bo‘limlari loyiha tashabbuskorlari tomonidan taqdim etilgan hujjatlarni ko‘rib chiqadi, asosliligini tekshiradi va tegishli xulosa berish uchun har oy yakuni bo‘yicha umumlashtirilgan ro‘yxat asosida Ishchi guruhga taqdim etadi.

Ishchi guruh tuman qishloq xo‘jaligi bo‘limlari tomonidan taqdim etilgan hujjatlarga asosan, tegishli xulosa qabul qiladi va subsidiya ajratish uchun talabnomalarni Qishloq xo‘jaligi vazirligiga, hisobot oyidan keyingi oyning 10 sanasiga qadar taqdim etadi.

Davlat budjetidan ajratiladigan subsidiya mablag‘larini ajratish uchun loyiha tashabbuskorlari tomonidan ishchi guruhga quyidagi hujjatlar taqdim qilinadi:

pudrat tashkilotlari bilan tuzilgan shartnoma;

tomchilatib sug‘orish texnologiyasini qurilganligi bo‘yicha bajarilgan ishlar to‘g‘risidagi dalolatnomalar;

ishchi organlari tomonidan tomchilatib sug‘orish texnologiyalarini foydalanishga topshirilganligi to‘g‘risidagi yakuniy xulosasi;

hisob-fakturalar;

bank bilan tuzilgan kredit shartnoma nusxasi (mavjud bo‘lsa);

Qishloq xo‘jaligi vazirligi Ishchi guruhlar tomonidan taqdim etilgan talabnomalarni 5 ish kuni ichida asosliligini tekshiradi hamda Suv xo‘jaligi vazirligi bilan kelishadi va Moliya vazirligiga taqdim qiladi.

Moliya vazirligi taqdim etilgan talabnomalar asosida tegishli mahalliy budjetlar parametrlariga o‘zgartirishlar kiritadi hamda Qoraqalpog‘iston Respublikasi Moliya vazirligi va viloyatlar moliya bosh boshqarmalari tomonidan Qoraqalpog‘iston Respublikasi Qishloq xo‘jaligi vazirligi hamda viloyatlar qishloq xo‘jaligi boshqarmalarining shaxsiy g‘azna hisob varaqlariga tegishli budjet mablag‘larini o‘tkazib beradi.

Qoraqalpog‘iston Respublikasi Qishloq xo‘jaligi vazirligi va viloyatlar qishloq xo‘jaligi boshqarmalari tomonidan mablag‘lar kelib tushganidan so‘ng, 5 ish kuni ichida tegishliligi bo‘yicha loyiha tashabbuskorlarining tijorat banklaridagi hisob raqamlariga o‘tkazib beriladi.

Loyiha tashabbuskorlarining tijorat banklaridagi hisob raqamiga kelib tushgan budjet subsidiyalaridan xo‘jalikning mavjud qarzdorliklarini qoplash uchun inkasso topshiriqnomalari qo‘yilishi mumkin emas.

Loyiha tashabbuskorlarining tomchilatib sug‘orish texnologiyalarini joriy etish bo‘yicha dastlabki taqdim etilgan va Ishchi guruh rahbarlari tomonidan tasdiqlangan Dasturda inobatga olingan yer maydonidan ortiq bo‘lgan qismiga qilingan xarajatlar loyiha tashabbuskorlarining o‘z mablag‘lari hisobidan amalga oshiriladi.

O‘zbekiston Respublikasi Vazirlar Mahkamasi huzuridagi Tadbirkorlik faoliyatini rivojlantirishni qo‘llab-quvvatlash davlat jamg‘armasi mablag‘lari hisobidan loyiha tashabbuskorlariga tomchilatib sug‘orish tizimlarini qurish, rekonstruksiya qilish va ularning butlovchi qismlarini sotib olish uchun bir gektarga 20 mln so‘mdan oshmaydigan qismiga ajratiladigan kreditlar bo‘yicha belgilangan foiz xarajatlarini qoplash O‘zbekiston Respublikasi prezidentining 2018 yil 27 dekabrdagi PQ–4087-son qarori va O‘zbekiston Respublikasi Vazirlar Mahkamasining “O‘zbekiston Respublikasi Vazirlar Mahkamasi huzuridagi Tadbirkorlik faoliyatini rivojlantirishni qo‘llab-quvvatlash davlat jamg‘armasi faoliyatini tashkil etish chora-tadbirlari to‘g‘risida” 2017 yil 8 sentyabrdagi 704-son qarori bilan tasdiqlangan O‘zbekiston Respublikasi Vazirlar Mahkamasi huzuridagi Tadbirkorlik faoliyatini rivojlantirishni qo‘llab-quvvatlash davlat jamg‘armasi to‘g‘risidagi Nizom talablari asosida amalga oshiriladi.

Tadbirkorlik faoliyatini rivojlantirishni qo‘llab-quvvatlash davlat jamg‘armasi tomonidan loyiha tashabbuskorlarining kredit majburiyatlari bo‘yicha foiz xarajatlarining 10 foizlik punktini qoplash bo‘yicha budjet mablag‘larini ajratish to‘g‘risidagi talabnomalar Moliya vazirligiga taqdim etiladi.

Moliya vazirligi tomonidan Tadbirkorlik faoliyatini rivojlantirishni qo‘llab-quvvatlash davlat jamg‘armasining talabnomalari ko‘rib chiqiladi va tegishli budjet mablag‘lari ilgari ajratilgan budjet mablag‘laridan foydalanilish holatini inobatga olgan holda ajratiladi. Bunda Moliya vazirligi tomonidan qo‘shimcha asoslantiruvchi hisob-kitob ma'lumotlari talab qilib olinishi mumkin.

Loyiha tashabbuskorlariga tomchilatib sug‘orish tizimlarini qurish, rekonstruksiya qilish va ularning butlovchi qismlarini sotib olish uchun ajratiladigan kreditlar bo‘yicha bir gektarga 20 mln so‘mdan oshgan qismi (kompensatsiya qilinmaydigan qismi) alohida tijorat krediti bilan rasmiylashtiriladi.

Tadbirkorlik faoliyatini rivojlantirishni qo‘llab-quvvatlash davlat jamg‘armasi tomonidan Loyiha tashabbuskorlarining tomchilatib sug‘orish texnologiyalarini joriy etish bilan bog‘liq loyihalari amalga oshirilgan yer maydonlari bo‘yicha keyingi yillarda amalga oshiriladigan loyihalari kredit majburiyatlarining bir qismini qoplashga yo‘l qo‘yilmaydi.