Ko‘zi ojizlar bosmaxonasini takomillashtirish bo‘yicha “Koʻngil koʻzi” loyihasi amalga oshiriladi

O‘zbekiston Respublikasi Prezidentining “O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi faoliyatini tashkil etish to‘g‘risida”gi qarori imzolandi.

Prezidentning mazkur qaroriga ko‘ra, “Ko‘zi ojizlar bosmaxonasi” korxonasining matbaa uskunalarini modernizatsiya qilish, binolari va ishlab chiqarish xonalarini ta'mirlash, moddiy-texnik bazasini mustahkamlashga qaratilgan “Koʻngil koʻzi” loyihasini amalga oshirish bo‘yicha “Yo‘l xaritasi” tasdiqlanmoqda.

Eslatib o‘tamiz, Matbuot va axborot agentligi bosh direktori K.Allamjonov yaqinda Respublika bo‘ylab ko‘zi ojizlar uchun maxsus maktablarda ta'lim olayotgan 3000 bola risoladagidek ta'lim ololmayotgani va ahvol yildan yilga yomonlashayotganini ta'kidlab o‘tgan edi.

Ungacha, Markaziy Osiyoda yirikligi bo‘yicha Brayl yozuvida kitoblar va darsliklar chop etuvchi yagona bosmaxona Toshkent shahar hokimiyatining noto‘g‘ri chiqargan qarori bois muammolarga duch kelayotgani, chunonchi, ijtimoiy ahamiyatga molik tashkilotga tegishli binolari va hududi to‘lig‘icha Toshkent shahar IIBB 62-bo‘limiga berib yuborilgani haqida Kun.uz tahliliy reportaj uyushtirgan edi.