YHX patrul avtomobillariga yangi turdagi fotoradarlar o‘rnatildi

Toshkent viloyati Yo‘l harakati xavfsizligi boshqarmasi viloyat hududida tezlik oqibatida yo‘l transport hodisalari salmog‘ini kamaytirish maqsadida patrul avtomobillarga yangi namunadagi maxsus avtomatlashtirilgan foto va video qayd etish texnika vositalari o‘rnatmoqda. Bu haqda viloyat IIB YHXB matbuot xizmati xabar bermoqda. 

Ma'lum qilinishicha, 2018 yilning 12 oyi viloyat hududida sodir etilgan yo‘l-transport hodisalarining kelib chiqish sabab va shart-sharoitlari tizimli ravishda kompleks tahlil qilinganda, qariyb 50 foiz yo‘l transport hodisalarini kelib chiqishiga tezlik asosiy omil bo‘lib qolmoqda.

«Ushbu patrul avtomobillarga o‘rnatilgan fotoradarlar real vaqt rejimida avtomatik ravishda qoidabuzarlikni qayd etadi», – deyiladi IIB xabarida.

Ta'kidlanishicha, qoidabuzarlik aniqlanganda simsiz aloqa orqali avtomobil raqami, sana, vaqt va voqea joyidan iborat bo‘lgan ma'lumotlarni «O‘zbekiston pochtasi»ning ma'lumotlarni qayta ishlash markazi orqali qoidabuzarlikni sodir etgan haydovchi yoki yuridik shaxsga pochta orqali xabar beradi.

Hozirda ushbu fotoradarlar test rejimida ishlamoqda.