Samarqandda YPX xodimining hayotini xavf ostida qoldirgan haydovchiga nisbatan jinoyat ishi qo‘zg‘atilib, qamoqqa olindi. Bu haqda YHXX matbuot xizmati xabar berdi.
Ma’lum qilinishicha, 5-avgust kuni Registon ko‘chasida xizmatdagi xodim yo‘l belgisiga amal qilmasdan harakatlanib kelgan Spark avtomobilini to‘xtatgan. Xodim haydovchidan tegishli hujjatlarini taqdim etishini so‘raganida, haydovchi xodimning qonuniy talabini bajarmagan.
Shundan so‘ng, yo‘l-patrul xizmati inspektori takroran haydovchidan tegishli hujjatlarini so‘rab, qo‘l uzatgan vaqtda, haydovchi oynani «qasddan yopib», mashinani haydagan va ma’lum masofagacha uni sudragan.
Tezkor qidiruv harakatlari davomida mazkur transport vositasi va uning haydovchisi aniqlanib, qo‘lga olingan.
Holat yuzasidan Samarqand shahri prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilib, tergov harakatlari olib borilmoqda. Haydovchi esa protsessual tartibda qamoqqa olindi.
