Qashqadaryo viloyatining Chiroqchi tumanida YPX xodimlarining toʻxtash ishorasiga boʻysunmasdan, ulardan qochishga uringan haydovchi 15 sutkaga qamaldi.
Voqea 12-avgust kuni sodir boʻlgandi. Tungi xizmatga jalb qilingan YPX inspektorlari tomonidan Nexia-2 avtomashinasi hujjatlarni tekshirish maqsadida toʻxtatilgan. Biroq haydovchi YPX xodimining qonuniy toʻxtash ishorasiga boʻysunmasdan, voqea joyidan yashirinishga uringan. Keyingi chorrahada xizmat olib borayotgan YPX xodimi tomonidan ham haydovchiga bir necha bor toʻxtash ishorasi berilganiga qaramay, u ichki ishlar organlari xodimlarining qonuniy talablarini bajarmasdan, harakatni davom ettirgan.
Oqibatda patrul ekipaji tomonidan qarama-qarshi yoʻnalishda harakatlanib kelayotgan Nexia-2 xizmat avtomashinasi yordamida cheklangan. Biroq haydovchi patrul avtomashinasini urib yuborib, voqea joyidan yana yashirinishga uringan. Koʻrilgan tezkor chora-tadbirlar natijasida haydovchining shaxsi aniqlanib, ushlangan.
«Hujjatim yoʻqligi sabab GAI xodimlaridan qoʻrqib, qarama-qarshi harakatlandim», – degandi u oʻshanda.
Chiroqchi tumani sudi qarori bilan haydovchiga Maʼmuriy javobgarlik toʻgʻrisidagi kodeksning 34-moddasi ikkinchi qismiga muvofiq, uzil-kesil 15 sutka qamoq jazosi tayinlandi. Sudda u qilmishidan pushaymonligini bildirgan.
