Pensiya ishlarini rasmiylashtirish to‘g‘risidagi yo‘riqnomaga o‘zgartirish kiritiladi

Normativ-huquqiy hujjatlar loyihalari muhokamasi portalida moliya vazirining “Pensiya ishlarini rasmiylashtirish va yuritish tartibi hamda pensiya hujjatlarining shakllari va ularni to‘ldirish qoidalari to‘g‘risidagi yo‘riqnomaga o‘zgartirish va qo‘shimchalar kiritish haqida”gi buyrug‘i loyihasi joylashtirildi.

Pensiya ishlarini rasmiylashtirish va yuritish tartibi hamda pensiya hujjatlarining shakllari va ularni to‘ldirish qoidalari to‘g‘risidagi yo‘riqnomaga kiritilishi mumkin bo‘lgan o‘zgartirish va qo‘shimchalar:

1-bandning ikkinchi xatboshisi quyidagi tahrirda bayon etiladi:

“Yakka tartibdagi tadbirkor (chet elda yollangan holda ishlovchi shaxs, dehqon xo‘jaligi a'zosi, oilaviy tadbirkorlik sub'yekti oilasi a'zosi uchun, shuningdek yakka tartibdagi tadbirkor tomonidan mehnat shartnomasi bo‘yicha yollangan xodimlar uchun) tomonidan:

2019 yil 1 yanvarga qadar bo‘lgan davr uchun – O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasiga sug‘urta badallari;

2019 yil 1 yanvardan keyingi davr uchun – yagona ijtimoiy to‘lov to‘langanligini tasdiqlovchi ma'lumotnoma uning yashash joyi bo‘yicha O‘zbekiston Respublikasi davlat soliq xizmati organlari tomonidan taqdim etilgan ma'lumotlar asosida beriladi.”.

11-bandning birinchi xatboshisi quyidagi tahrirda bayon etiladi:

“Inspektor arizachi yoki tashkilot vakiliga taqdim etilgan hujjatlarning (mehnat daftarchasi, arxiv ma'lumotlari, tashkilot tomonidan taqdim etilgan ma'lumotnomalar, yakka tartibdagi tadbirkor (chet elda yollangan holda ishlovchi shaxs, dehqon xo‘jaligi a'zosi, oilaviy tadbirkorlik sub'yekti oilasi a'zosi uchun, shuningdek yakka tartibdagi tadbirkor tomonidan mehnat shartnomasi bo‘yicha yollangan xodimlar uchun) tomonidan 2019 yil 1 yanvarga qadar bo‘lgan davr uchun sug‘urta badallari, 2019 yil 1 yanvardan keyingi davr uchun esa yagona ijtimoiy to‘lov to‘langanligini tasdiqlovchi ma'lumotnomalar va soliq agenti hisoblanmaydigan ish beruvchidan daromad oluvchi xodimning jami yillik daromad to‘g‘risidagi deklaratsiyalaridan tashqari) asl nusxalarni qaytaradi va unga arizaning tegishli qismini qirqib olgan holda, hujjatlar qabul qilinganligi to‘g‘risida tilxat beradi, bunda tilxat nusxasi taqdim etilgan hujjatlar bilan birgalikda Pensiya jamg‘armasi bo‘limida saqlanadi. Mehnat daftarchasining asl nusxasi Pensiya jamg‘armasi bo‘limining pensiya tayinlash komissiyasi (keyingi o‘rinlarda - komissiya deb yuritiladi) tomonidan pensiya, ijtimoiy nafaqa va boshqa to‘lovlarni tayinlash yoki tayinlashni rad etish to‘g‘risidagi qarori qabul qilingandan so‘ng arizachiga qaytarilishi shart.”.

13-band quyidagi tahrirda bayon etiladi:

“Inspektor pensiya, ijtimoiy nafaqa va boshqa to‘lovlarni tayinlash uchun taqdim etilgan hujjatlar asosida kompyuter bazasiga ma'lumotlarni kiritadi, ish staji, o‘rtacha ish haqi, pensiya, ijtimoiy nafaqa yoki boshqa to‘lovlar miqdorini hisoblaydi, hisob-kitoblarni chop etadi va pensiya, ijtimoiy nafaqa va boshqa to‘lovlarni tayinlash yoki tayinlashni rad etish to‘g‘risida komissiya qarori loyihasini tayyorlaydi. Barcha ma'lumotlar kiritilgandan so‘ng kompyuter bazasi tomonidan pensiya ishiga raqam beriladi hamda pensiya yig‘majildi ushbu raqam bilan qayd etiladi.  
 
Inspektor ariza beruvchining soliq to‘lovchining identifikatsiya raqami va shaxsiy jamg‘arilib boradigan pensiya hisobvarag‘iga asosan O‘zbekiston Respublikasi Davlat soliq qo‘mitasi va Aksiyadorlik-tijorat Xalq banki bilan axborot almashinuvi bo‘yicha o‘zaro hamkorlik, shu jumladan, axborot-kommunikatsiya texnologiyalaridan foydalangan holda, ariza beruvchining ish staji, ish haqi va 2019 yil 1 yanvarga qadar bo‘lgan davr uchun hisoblangan sug‘urta badallarini, 2019 yil 1 yanvardan keyingi davr uchun esa mehnatga haq to‘lash tarzidagi daromadlar summasini o‘zaro solishtiradi.”.

18-banddagi  “mansabdor shaxsning imzosi, shuningdek tashkilot” so‘zlaridan keyin “(tadbirkorlik sub'yektlaridan tashqari)” so‘zlari qo‘shiladi.

22-band quyidagi tahrirda bayon etiladi:

“To‘lov hujjatlari rasmiylashtirilgandan so‘ng pensiya yig‘majildi inspektorga qaytariladi, inspektor o‘z navbatida pensiya yig‘majildini Pensiya jamg‘armasi arxivida saqlash uchun arxivariusga topshiradi.”.

30-2-band o‘z kuchini yo‘qotgan deb topiladi.

35-banddagi  “, shundan so‘ng tashkilot” so‘zlaridan keyin “(tadbirkorlik sub'yektlaridan tashqari)” so‘zlari qo‘shiladi.

44-band quyidagi tahrirda bayon etiladi:

“Pensiya, ijtimoiy nafaqa va boshqa to‘lovlar to‘lovi amalga oshirilgan muddat pensioner (nafaqa oluvchi)ning pensiya yig‘majildiga kiritiladi.”.

45-band quyidagi tahrirda bayon etiladi:

“Pensiya yig‘majildini hisobdan chiqarish avvalgi yashash joyi bo‘yicha Pensiya jamg‘armasi bo‘limi pensiya va nafaqalar to‘lovi monitoringi guruhi tomonidan rasmiylashtiriladi. Bu haqdagi tegishli yozuv pensiya yig‘majildi, shuningdek mazkur Yo‘riqnomaning 28-ilovasiga muvofiq, pensioner (nafaqa oluvchi) yashash manzili o‘zgarganligi munosabati bilan pensiya yig‘majildini hisobdan chiqarishni ro‘yxatga olish kitobiga kiritiladi.”.