Efiopiyadagi aviahalokatda 35 ta davlat fuqarolari halok bo‘ldi

Ethiopian Airlines aviakompaniyasining Addis-Abebadan Nayrobiga parvozni bajarish  vaqtida halokatga uchragan  Boeing 737 samolyotida 157 kishi, jumladan ekipajning 8 a'zosi bo‘lgan.

Samolyot 10 mart ertalabki soat 08:38da Bole xalqaro aeroportidan havoga ko‘tarilgan. U bilan aloqa 08:44 da yo‘qolgan. Aviakompaniya bosh direktori Tevolde Gebremariamning ma'lum qilishicha, uchishdan ko‘p o‘tmay samolyot sardori falokat signalini berib, muammo haqida ma'lum qilgan va aeroportga qaytishni so‘ragan. Shundan keyin samolyot bilan aloqa yo‘qolgan. Gebremariamning ta'kidlashicha, ba'zi ma'lumotlarga ko‘ra, samolyotda tutunlanish bo‘lgan. 

Barcha yo‘lovchilar halok bo‘lgan. Ular orasida 35 ta davlat fuqarolari bo‘lgan, jumladan: Kanadaning 18 fuqarosi; Keniya - 32; Efiopiya – 9; Italiya – 8; Xitoy – 8; AQSh – 8; Buyuk Britaniya – 7; Fransiya – 7; Misr – 6; Germaniya – 5; Hindiston – 4; Slovakiya – 4; Avstriya – 3; Shvetsiya – 3; Marokash – 2; Ispaniya – 2; Isroil – 2; Polsha – 2; Belgiya, Jibuti, Serbiya, Norvegiya, Irlandiya, Indoneziya, Yaman, Uganda, Sudan, Ruanda, Somali, Togo, Mozambik, Saudiya Arabistoni, Nepal, Nigeriyadan bir kishidan.

Yana bir kishi BMT pasporti bilan bo‘lgan, uning millati aniqlashtirilmoqda. Ekipajning barcha a'zolari Efiopiya fuqarolari bo‘lgan. ANSA axborot agentligining ma'lum qilishicha, halokatda taniqli italiyalik arxeolog, Sitsiliya oroli mahalliy ma'muriyatining madaniyat bo‘yicha maslahatchisi Sebastyano Tuza halok bo‘lgan. Shuningdek, fojia Slovakiya parlamenti deputati Anton Grnkning rafiqasi va o‘g‘li hayotiga zomin bo‘lgan.