AQSh Hindiston sun'iy yo‘ldoshlarga qarshi raketa uchirganini tasdiqladi

AQSh kosmik qo‘mondonligi qo‘mondoni o‘rinbosari, general-leytenant Devid Tompsonning ma'lum qilishicha, Amerika raketalarga qarshi ogohlantirish tizimlari Hindiston sun'iy yo‘ldoshga qarshi raketa uchirganini qayd etgan. Bu haqda CNN xabar bermoqda.

Tompsonning tasdiqlashicha, Hindiston raketasi mo‘ljalni aniq nishonga olgan. Shuningdek, uning qo‘shimcha qilishicha, AQSh sinovlardan keyin paydo bo‘lgan qoldiqlar bulutida taxminan 270ta obekt mavjudligini kuzatmoqda.

Bundan oldin, Hindiston Yer sun'iy yo‘ldoshini urib tushirgani xabar berilgandi.

Mamlakat bosh vaziri Narendra Modining xalqqa murojaatda ma'lum qilishicha, Hindiston Yer yaqinidagi past orbitada joylashgan kosmik apparatni muvaffaqiyatli urib tushirib, sun'iy yo‘ldoshlarga qarshi qurolga ega dunyodagi to‘rtinchi davlatga aylangan.