Manchesterdagi «asal oyi» nihoyasiga yetdi, dekabrdan buyon umuman mag‘lubiyatga uchramay kelgan Sulsher oxirgi 4 o‘yinning 3tasida yutqazdi. Bu yaqinda 3 yillik shartnoma imzolagan murabbiydan ko‘ra, jamoa tarkibida muammolar borligini yana bir bor namoyon qildi. O‘z-o‘zidan yozda Manchesterni tark etishi kerak bo‘lgan asosiy nomlar va yangi xaridlar haqida xabarlar paydo bo‘ldi. Bu ma'lumotlar mish-mish emas, VVS, Sky va Independent kabi yirik nashrlar tomonidan tarqatilayotganini e'tiborga olib, vaziyatga chuqurroq qarashga urindik. Xo‘sh, Manchesterning bu yozi qanday bo‘ladi?
KeTIShI MUMKIN:
Xuan Mata va Ander Errera
2014 yilning yanvarida o‘sha paytda APL uchun rekord miqdor bo‘lgan 37 million funt evaziga «Chelsi»dan sotib olingandi. Mata «Old Trafford»da to‘rtinchi murabbiy bilan ishlayapti, ammo ularning hech birida almashtirib bo‘lmas futbolchi, jamoa yetakchisiga aylanmadi. Shu bilan birgalikda, barqaror ravishda foydali futbolchi bo‘ldi, kerakli paytda, ba'zi pallalarda muhim figuraga ham aylandi.
Mataning Manchesterga kerak bo‘lmay qolganini aytish mushkul, ammo futbolchi shu oyda 31 yoshga to‘ladi. Bu yoshdagi futbolchiga klub faqat qisqa muddatli shartnoma taklif qilishi mumkin, Mata esa, faoliyatidagi oxirgi yirik shartnoma uchun boshqa variantlar izlashi mantiqan to‘g‘ri. Ispaniyalik yarim himoyachi 3-4 yillik shartnoma taklif qiladigan va bu davrda asosiy tarkibdan joy bera oladigan boshqa klublardan taklif kutishi mumkin. Zero, u yozda erkin agentga aylanadi. Xuanning sobiq klubi «Valensiya», Italiyaning «Inter» va hatto «Barselona» varianti ham tilga olinmoqda. Aniqki, kataloniyaliklar ham katta shartnoma taklif qilishmaydi, ammo Ispaniyaga qaytish, bir qator sovrinlar yutish, va albatta, Messi bilan birga o‘ynash taklifi har qanday futbolchini o‘ylantirishi tabiiy.
O‘z vaqtida Ander Errerani ham David Moyyes olib kelishi mumkin edi, ammo ba'zi tushunmovchiliklar tufayli, bu transfer bir yilga kechikib, Ander Manchesterdagi debyutini Lui van Gaal qo‘l ostida qilgandi. Matadan bir yosh kichik, lekin hamyurtiga berilgan ta'riflarning ko‘pi unga ham tushadi. Errera ayniqsa, maydonda bor kuch bilan harakat qilishi, «MYu»ga chin dildan muxlislik qilishi bilan ham fanatlarning sevimli futbolchisiga aylangan, 2016/17 yilda klubning eng yaxshi futbolchisi deb e'tirof etilgan.
Matadan farqli ravishda, Errera Sulsher qo‘l ostida asosiy futbolchilardan biriga aylandi, Pogba va Matich bilan birgalikda yarim himoyadagi uchlikni tashkil qildi. Albatta, klub uni olib qolishga urinadi, ammo juda ko‘p nashrlar unga «PSJ» tomonidan yaxshi shartnoma taklif qilinayotganini yozishmoqda. Parijliklar Errera bilan haftasiga 200 ming funt maosh nazarda tutilgan 4 yillik shartnoma tuzishga tayyorligi aytilmoqda. «MYu» esa taklif miqdorini 170 ming funtdan oshirmoqchi emas.
Bu yerda ham klubni tushunsa bo‘ladi. Errera bugungi kunda foydali futbolchi, ammo uning asosiy ustunliklari, masalan o‘yinni boshqarish, zargarona paslar berish emas, asosan jismoniy harakat talab qiladigan fazilatlardir. Tabiiyki, yildan yilga Erreraning foydalilik koeffitsiyenti tushib boradi. Yuqori maosh bilan esa, uni sotish qiyinlashib ketadi. Shundoq ham, klub aynan shu borada yaxshi ishlay olmagani uchun so‘nggi yillarda yaxshi pulga futbolchi sota olmayapti. Har yili jamoa o‘yiniga javob bera olmaydigan, ammo yuqori maoshi tufayli sotib yuborishni ham iloji bo‘lmagan «ballast» yetarli bo‘lmoqda.
Agar «PSJ»ning taklifi o‘z tasdig‘ini topsa yoki boshqa shu kabi takliflar kuzatilsa, «MYu»ga futbolchini olib qolish oson bo‘lmaydi. Bu masalada klub rahbariyatining jiddiy xatosi bor. Aynan bugun «PSJ»dan oshirib taklif berish mantiqan noto‘g‘ri ekani aniq, ammo Vudvord futbolchi bilan avvalroq, parijliklar taklif bilan chiqmasdan oldin kelishib qo‘yishi lozim edi. Jamoa uchun foydali bo‘lgan futbolchining shartnoma muddati 3 oy qolguncha «jim yurish» zamonaviy shartlarda eng yumshoq qilib aytganda, «soddalik»dir.
Aleksis Sanchis
Klubning balki so‘nggi o‘n yillikdagi eng omadsiz xaridlaridan biri. Oldingi «7»lar Anxel Di Mariya va Memfis Depay kabi transferlari ham «chakki» bo‘lmagandi, ammo bu futbolchilar o‘ziga yarasha narxga sotilgan va transferning qaysidir qismi qoplangan. Angliyada eng katta maosh bilan shartnoma imzolagan Sanchesni biror klubga sotish ham u qadar oson bo‘lmasligi turgan gap.
Ikkinchidan, aynan uning kelishi Mourino jamoasidagi muhitning buzilishida turtki bo‘lgandi. Pogba bilan muammolar, Marsiyal yoki Shoudagi noroziliklar aynan Sanches uchun imkoniyat boshqalarga nisbatan ko‘proq taqdim etilaverishi oqibatida yuzaga kelgan. Yangi shartnomalar bo‘yicha bugungi og‘ir jarayonning ham sababchisi o‘sha transfer – David de Xea Sanchesniki kabi maosh talab qilmoqda, Erreraga ham bu holat ta'sir qilgani shubhasiz.
Sulsher davrida ham Sanchesga yetarlicha imkoniyat berildi, ammo Reshford, Marsiyal va Lukaku bilan raqobatda katta farq bilan yutqazayotgan Aleksis buning ustiga jarohatlanib ham oldi. Yangi xaridlar, maoshlar muvozanati uchun Sanchesning sotilishi juda muhimdir. Klub bu borada yon bosishi, balki aslidan arzonroq shartlarda ham uni qo‘yib yuborishga rozi bo‘lishi mumkin. Bunday jarayonlarni juda yaxshi kuzatadigan «Yuventus» va «Bavariya» chililik futbolchiga befarq emasliklari haqida xabarlar ham paydo bo‘lgan.
Erik Bayi
Joze Mourinoning Manchesterdagi ilk xaridlaridan biri. Dastlabki o‘yinlarda juda yaxshi taassurot qoldirib, himoya chizig‘ining yetakchisiga aylangan Bayi keyinchalik ishonchni yo‘qotdi. Uning iqtidori, individual mahorati hali ham shubha ostiga olinmaydi, lekin ba'zida o‘ziga xaddan tashqari ishonib yuborishi, sovuqqonlikni saqlab olmasligi natijasida bir qator qo‘pol xatolarga yo‘l qo‘ydi. Buning ustiga jarohatga moyil ham – ushbu mavsum Bayi o‘yinga to‘liq tayyor bo‘lgan holatlar juda kam bo‘ldi. Bir yil keyin safga qo‘shilib, ko‘p borada Bayidan ortda bo‘lgan Viktor Lindelyof ushbu mavsumda har jihatdan o‘sdi va Mourinoning ham, Sulsherning ham dastlabki tanloviga aylandi.
Katta ehtimol bilan yozda yana bir markaziy himoyachi sotib olinadi va u holda Bayi kamida Lindelof va Smollingdan keyin uchinchi variantga aylanib qoladi. Yosh va iqtidorli himoyachini bu qoniqtirmasligi aniq. Klub uchun ham Bayining transferi foydaliroq bo‘lishi mumkin.
2020 yilda Bayining shartnoma muddati o‘z nihoyasiga yetadi. Yangi shartnoma yoki eskisini uzaytirish haqida xabarlar yo‘qligidan kelib chiqsak, bunday muzokaralar ham faol tarzda o‘tmayapti. Demak, klub yozda Bayini sotib yuborishga qarshi emas, mabodo buning iloji bo‘lmasa, balki yangi shartnoma haqida yangi mavsumda o‘ylab ko‘rish mumkin bo‘ladi.
Matteo Darmian
2015 yilda Lui van Gaal tomonidan 12 million funt evaziga olib kelingan. Italiyalik qanot himoyachisi yomon boshlamagandi, lekin keyinchalik asosiy tarkibdan chetda qoldi. Taktik jihatdan italiyalik himoyachilarga xos ravishda juda yaxshi shakllangan bo‘lishiga qaramay, aynan APL uchun jismoniy tarafdan muammolarga duch keldi. Ayniqsa, yakkakurashlarda va to‘p nazorat qilishda tempga dosh berolmadi.
Zaxira variant sifatida foydali, maoshi ham katta emasligini e'tiborga olsak, qolishi mumkin. Ammo yozda erkin agentga aylanadigan Matteoda «MYu»dan ko‘ra qiziqroq, muhimi, maydonga ko‘proq tushiladigan variantlar bor. Angliyada ishonchli ko‘rinmagan bo‘lsa-da, u Italiyaning har qanday jamoasida o‘ynay oladi, buni terma jamoadagi o‘yinlari orqali ham ko‘rganmiz.
Xabarlarda yozilishicha, «Inter» unga shartnoma taklif qilmoqda, shuningdek, ikki yildan beri «Yuventus» ham Matteoni o‘z safida ko‘rishni istayotgani yangilik emas. Katta ehtimol bilan Darmian yozda Italiyaga qaytib ketishi mumkin.
Antonio Valensiya
Bu ruyxatda Aleks Fergyuson davrida olib kelingan yagona futbolchi. Valensiya 2009 yilda, Ronalduning o‘rnini bosish uchun olib kelingan va hatto unga «7» raqam berilgandi. Antonio bu bosimni ko‘tara olmadi va o‘z istagi bilan bu raqamdan voz kechgandi ham.
Umuman olganda, undan «yangi Ronaldu» chiqmagan bo‘lsa-da, qariyb o‘n yil barqaror va foydali to‘p surdi, so‘nggi yillarda jamoa sardoriga aylandi. Ammo ushbu mavsumda Antonioda ham muammolar yuzaga keldi – avvaliga kichik jarohatlar, Mourino bilan tushunarsiz munosabatlar, instagram bilan bog‘liq voqealar, davomidan yana jarohat. Xullas, Valensiya bu mavsumda APLda atigi 5 o‘yinda maydonga tushdi. Oxirgi va Sulsher qo‘l ostidagi yagona o‘yin – 3 yanvardagi «Nyukasl»ga qarshi uchrashuv.
Valensiya hozirda mashg‘ulotlarga qaytgani aytilmoqda va balki, Eshli Yangning qizil kartochkasidan keyin, navbatdagi turda uni ko‘rishimiz ham mumkin. Lekin Valensiyaning jamoani tark etishi aniq. Futbolchiga APLda ham jiddiy qiziqishlar bo‘lishi turgan gap, masalan, «Arsenal» va «Vest Hem» variantlari ko‘proq tilga olinmoqda.
KeLIShI MUMKIN
JYeYDON SANChO («Borussiya D»)
19 martda 19 yoshga to‘lgan ingliz futbolchisi Londonda tavallud topgan. «Uotford» va «Manchester Siti» tarbiyalanuvchisi bo‘lgan hujumchini «Borussiya» 2017 yilning yozida, «Barselona»ga sotilgan Usmon Dembele transferidan tushgan mablag‘ning o‘ndan birini sarflab sotib oladi. Bir yil o‘tib esa, Sancho nafaqat Germaniyaning, balki Yevropaning eng yaxshi yosh futbolchilaridan biriga aylandi, jamoasining 21 golida (9 gol, 13 pas) bevosita ishtirok etdi.
Yozda futbolchi bilan qiziqadiganlar ko‘p bo‘ladi, lekin talabgorlar ichida favorit sifatida «Manchester Yunayted» nomi tilga olinmoqda. Futbolchining o‘zi Angliyaga qaytmoqchi, ingliz top-klublari ichida esa, Sanchoning transfer narxini «feyr pley» doirasida to‘lay oladigan va futbolchiga asosiy tarkibdan kafolat bera oladigan klub «MYu»dir.
Jyeydon asosan o‘ng qanotda harakat qiladi. «MYu»da esa, aynan mana shu pozitsiya bir necha yildan beri og‘riqli sanaladi. Marsiyal – Reshford – Sancho uchligini oldingi chiziqda ko‘rish Sulsherning asosiy istaklaridan biri ekani aytilmoqda. Sanchoning narxi taxminan 80-90 million funt deb baholanmoqda.
AARON UAN-BISSAKA («Kristal Pelas»)
Asl kelib chiqishi kongolik bo‘lgan va ushbu mamlakat o‘smirlari tarkibida maydonga ham tushgan o‘ng qanot himoyachisi keyinchalik Angliya yoshlar terma jamoasidan taklif oldi. 22 yoshli futbolchi ayniqsa, ushbu mavsumda «Kristal Pelas» tarkibida yorqin o‘yin ko‘rsatmoqda. U avgust-oktabr oylarida qatorasiga uch oy jamoaning eng yaxshi o‘yinchisi deb ham e'tirof etildi.
Bissaka taxminan 30-40 million funt evaziga Antonio Valensiya va Eshli Yangga asosiy o‘rinbosar bo‘la olishi mumkin. U va Diyegu Dalot kelajakda «MYu»ning o‘ng qanotini tashkil qilishi kutilmoqda.
KALIDU KULIBALI («Napoli»)
Agar Mourino iste'foga chiqarilmaganda, balki yanvardayoq ushbu futbolchi Manchesterga kelishi mumkin edi. 27 yoshli senegallik futbolchi haqida o‘tgan yilning yozidan gapirila boshlagan, ammo neapolliklar qo‘ygan katta narx «MYu»ni to‘xtatgandi. O‘sha narx, ya'ni taxminan 100 million yevro, hali ham o‘zgargani yo‘q, ammo manchesterliklarning vaziyatga bo‘lgan munosabati o‘zgargani tabiiy. Jamoa himoya markazida yaqqol muammolarga duch kelmoqda va ayniqsa, tajribali top-himoyachining jamoa o‘yiniga qay tariqa ta'sir qilishi mumknnligi Virjiyl van Deyk tranferida ham ko‘rindi. «Liverpul» uni qariyb 90 million yevroga sotib olganida, ko‘pchilik hayron qolgan, ammo hozirda hech kim o‘sha rekord narxni eslamayapti ham.
Kulibali «Napoli»da so‘nggi mavsumini o‘tkazayotgani ham, uning ingliz futboliga moslashib ketishi ham haqiqatga yaqinroq, faqat yagona to‘siq uning transfer narxi «MYu»ning boshqa variantlarga murojaat qilishiga sabab bo‘lmaydimi? Masalan, Sulsher ko‘proq Rafael Varanga qiziqmoqda, lekin katta ehtimol bilan Zinedin Zidan fransiyalik himoyachini olib qolishning uddasidan chiqsa kerak. «Real» bilan barcha sovrinlarni yutgan Varanning boshqa sarguzasht istab qolishigina «MYu»ga imkoniyat qoldirishi mumkin.
DeKLAN RAYS («Vest Hem»)
Erreraning ketishi mumkinligi, Fredning hali ham jamoa o‘yiniga moslashib ketmagani, Matichning yosh emasligi «MYu»ga tayanch yarim himoyachi izlash ehtiyojini ham yaratishi turgan gap. 15 yoshigacha «Chelsi»da tarbiyalangan, keyin esa «Vest Hem» akademiyasiga o‘tib, 2 yildan beri ushbu jamoa safida to‘p surib kelayotgan Deklan foydali xarid bo‘lishi mumkin.
Arzonroq, ingliz futboli sinovidan o‘tgan, zaxirada qolib, kerakli paytda Matich yoki MakTomminini almashtirishga tayyor bo‘lgan 20 yoshli futbolchining xarididan minuslarni topish mushkul. Haqiqiy tayanch yarimhimoya futbolchisi va shu bilan birga, maydonni yaxshi ko‘ra olish qobiliyati tufayli himoya va yarim himoya o‘rtasida bog‘lovchilik qila oladi. «Vest Hem» bosh murabbiyi Manuel Pellegrini uni Xaver Maskeranoga qiyoslab, ayni paytda Angliya terma jamoasi uchun eng yaxshi tayyor tayanch yarim himoyachisi ekanini aytdi.
Kelib chiqishi irlandiyalik bo‘lib, 2019 yili Angliya terma jamoasiga chaqirilguncha barcha yoshdagi Irlandiya terma jamoalarida to‘p surgan Rays balkim Manchesterning yangi Roy Kini bo‘lishi mumkin.
...VA BOShQALAR
Bu nomlardan tashqari ham, ismi «MYu» bilan bog‘lanayotgan bir qator futbolchilar bor. Masalan, «Barselona»ga moslasha olmayotgan Filipe Koutino agar sotiladigan bo‘lsa, unga asosiy talabgor sifatida «MYu» nomi tilga olinmoqda. Shuningdek, «Chelsi»ning yosh iqtidori Kallum Hadson-Odoi ham jamoadagi noaniqlik tufayli yangi shartnoma tuzishga shoshilmayapti. Bu holat ham «Manchester Yunayted» kuzatuvida. «Atletiko»ning 25 yoshli yarim himoyachisi Saul Nuges ham ikki Manchester klubining qiziqish doirasiga kirib qolgan.
Ketadiganlar orasida, yana Markus Roho, Fil Jons, Eshli Yang kabi futbolchilarning ham, mos takliflar chiqqanda jamoani tark etish ehtimoli mavjud. Bu nomlarning barchasi Sulsher qo‘l ostida asosiy futbolchi bo‘lmasligi haqiqatga yaqinroq. Yozda amalga oshirilishi kerak bo‘lgan yana bir asosiy vazifa – David de Xea masalasiga oydinlik kiritishdir. Darvozabonning shartnomasi 2020 yilda nihoyasiga yetadi. Bir yildan keyin Davidning tekinga ketib qolmasligi uchun yangi kelishuvga erishilishi shart. Bir tomondan De Xeaning ispan do‘stlari Manchesterni tark etishga yaqinligi uning qaroriga salbiy ta'sir qilsa, balkim klubning transfer siyosati va yozdagi ambitsiyalar De Xeani yangi shartnomaga undashi mumkin.
Albatta, uchinchi tomonning ham pozitsiyasi muhim – darvozabon uchun asosiy talabgor bo‘lgan «Real»ning qiziqishi qay darajada bo‘ladi? Kurtua, Navas kabi top-darvozabonlar, shuningdek, o‘z o‘g‘li misolida nomzodlarga ega bo‘lgan Zidan bu safar De Xeani qattiq xohlamasligi mumkin.
Q.Aslanov
