AQSh ilk marotaba Eronning nufuzli harbiylarini terrorchi sifatida tan olishga qaror qildi

AQSh prezidenti Donald Tramp ma'muriyati Eronning «Islom inqilobi soqchilari korpusi» nufuzli harbiy-siyosiy tuzilmasini terroristik tashkilot sifatida tan olishni mo‘ljallamoqda. Bu haqda The Wall Street Journal yozyapti.

Ta'kidlanishicha, Vashington bu qaror haqida 8 aprel, dushanba kuni e'lon qilishi mumkin. Ushbu qadam Amerika tomonining Tehronga nisbatan bosimini yanada oshiradi. Biroq, ushbu masala bo‘yicha ma'muriyat vakillarining pozitsiyasi ikkiga bo‘lingan.

Qayd etilishicha, ilk marotaba «xorijiy davlatning elementi» terroristik tuzilma deb rasman tan olinishi mumkin.

Bundan oldin, AQSh Eronga qarshi sanksiyalarni kuchaytirmoqchi ekani xabar qilingandi.

Qo‘shma Shtatlar Eronga nisbatan yangi sanksiyalar joriy etishni rejalashtirmoqda, ular avval cheklov choralari bilan qamrab olinmagan iqtisodiyot sektorlariga zarba beradi.