Belarus Respublikasi poytaxti Minsk shahrida Minsk viloyati ijroiya qo‘mitasi va Toshkent viloyati hokimligi delegatsiyasi o‘rtasida o‘zaro hamkorliklarni mustahkamlash bo‘yicha muzokaralar o‘tkazildi. Bu haqda Toshkent viloyat hokimligi matbuot xizmati Kun.uz’ga ma'lum qilmoqda.
Tashrifning birinchi kuni o‘tkazilgan muzokaralarda Toshkent viloyati hokimi G.Ibragimov va Minsk oblastining ijroiya qo‘mitasi raisi A.Isachenko tomonidan «2019–2021 yillarga mo‘ljallangan Belarus Respublikasining Minsk oblasti va O‘zbekiston Respublikasining Toshkent viloyatlari o‘rtasidagi hamkorlikni rivojlantirish bo‘yicha chora-tadbir rejasi (yo‘l xaritasi)» imzolandi.
Shuningdek, Belarusning go‘sht va sut mahsulotlarini ishlab chiqarish bo‘yicha salohiyatli investorlari bilan uchrashib, dunyoning yetakchi brendi hisoblangan «Zdravushka-Milk» OAJ bilan qo‘shma korxona tuzish bo‘yicha kelishuv imzolandi. Kelishuvga asosan, Toshkent viloyatida zamonaviy chorvachilik klasterini tashkil etish, yuqori texnologiyali sut va go‘sht mahsulotlarini yetishtirish va qayta ishlash, Belarusdan 2000 bosh naslli qoramollar va qishloq xo‘jaligi texnikalarini yetkazib berishga kelishildi.
Ushbu chorvachilik klasteri, shuningdek, yuqori texnologik asbob-uskunalar hamda yuqori saviyali kadrlar tayyorlaydi, chorvachilik xo‘jaliklariga va aholiga veterinariya xizmatlarini ko‘rsatadi hamda ularni naslli qoramollar bilan ta'minlaydi.
Buning uchun Bo‘ka tumanidan 1200 gektar yer maydoni ajratilishi hamda chet el investitsiyasi hisobidan loyihaning moliyalashtirilishi belgilandi.
Shuningdek, Toshkent viloyatining Olmaliq shahri hokimi U.Karimov hamda Minsk oblastining Jodino shahri ijroiya qo‘mitasi raisi D.Zablotskiy bilan «O‘zbekiston Respublikasining Olmaliq va Belarus Respublikasining Jodino shaharlari o‘rtasida hamkorlik to‘g‘risida» o‘zaro kelishuv imzolandi va hamdo‘stlik aloqalari o‘rnatildi.
Toshkent viloyati delegatsiyasining tashrif kunlari doirasida viloyat hokimi G.Ibragimov va Belarus Respublikasi Millatlar yig‘ini Kengashi raisi M.Myasnikovich o‘rtasida keng qamrovli muzokaralar o‘tkazildi. Unga ko‘ra Toshkent viloyati va Belarus Respublikasi o‘rtasida iqtisodiy-ijtimoiy, ilm-fan va ta'lim, investitsiyaviy hamkorlik va gumanitar sohalar bo‘yicha aloqalarni mustahkamlash masalalari muhokama qilindi.
Tashrif doirasida delegatsiya «Dzerjinskiy Agrokombinat» OAJ bilan Toshkent viloyatida zamonaviy agroklaster tashkil etish bo‘yicha kelishuvga erishildi va viloyatning salohiyati hamda ichki bozori marketingini tahlil qilish uchun agrokombinatning rahbar va mutaxassislari Toshkent viloyatiga taklif qilindi.
Tashrifning ikkinchi kuni Belarus qishloq xo‘jaligi vazirligida Toshkent viloyatiga naslli qoramollarni va zamonaviy zootexnika vositalarini yetkazib berish hamda veterenariya mutaxassislarni o‘qitish masalalari muhokama qilindi.
Toshkent viloyatining Yer resurslari va davlat kadastri boshqarmasi mas'ul xodimlari o‘zlarining Belorussiyalik hamkasblari bilan hududdagi barcha turdagi yer resurslari hisobotini yuritishning zamonaviy metodologiyasini joriy qilishda zamonaviy informatsion texnologiyalardan foydalanish, mutaxassislarni o‘zaro almashish, Belorussiya tizimini o‘rganish, yerdan samarali foydalanish bo‘yicha masalalari muhokama qildi.
Toshkent viloyatida tashkil etiladigan zamonaviy chorvachilik agroklasteri qurilishini va jihozlanishini moliyalashtirish masalalari ko‘rib chiqildi.
Toshkent viloyati delegatsiyasining Belarus Respublikasiga tashrifining ikkinchi kunida shuningdek:
«Belvitunifarm» OAJ bilan Toshkent viloyatida veterenariya preparatlarini ishlab chiqarish bo‘yicha zamonaviy korxona qurish;
«Mark Farmel» kompaniyasi bilan Toshkent viloyatida zamonaviy to‘qimachilik va tikuvchilik korxonasini tashkil etish;
Mebel va qurilish materiallari ishlab chiqarish bo‘yicha Belarusning yetakchi korxonalari bilan o‘zaro hamkorlik masalalari muhokama qilindi.
Serhosil kartoshkaning seleksion navlarini yuqori reproduksiyalarni Toshkent viloyati sharoitida ekish va ko‘paytirish masalalari bo‘yicha amalga oshiriladigan dolzarb vazifalar kelishib olindi.
Olmaliq shahar xokimi U.Karimov Jodino shahriga tashrif buyurib zamonaviy sanoat korxonalari hamda shaharsozlik va ijtimoiy soha obektlarini rivojlantirish masalalari bo‘yicha shahar rahbariyati bilan muzokara o‘tkazdi.
Toshkent viloyati delegatsiyasi Minsk oblastining Smolevichi rayonidagi zamonaviy chorvachilik korxonasida ishlab chiqarishni tashkil etish, qayta ishlash korxonalari bilan kooperatsiyani yo‘lga qo‘yish hamda korxonaning faoliyatini iqtisodiy samaradorlik darajasining tahlili muhokama qilindi.
O‘zbekiston Respublikasining Belarus Respublikasidagi elchixonasi va Savdo sanoat palatasi Toshkent viloyati hududiy boshqarmasi bilan viloyatga belaruslik investorlarini keng jalb qilish, viloyatning va respublikaning investitsion jozibadorligini muntazam ravishda taqdimot qilib borish bo‘yicha asosiy vazifalar belgilab olindi.
Toshkent viloyati hokimligi delegatsiyasi tashrifi davomida jami: umumiy qiymati 16 mln 900 ming dollarlik 7 ta investitsion loyihani amalga oshirish, 770 ta yangi ish o‘rinlari yaratish, 12,3 mln dollarlik eksportni amalga oshirish bo‘yicha shartnomalar (kelishuvlar) imzolandi.
Yuqoridagi loyihalarni amalga oshirish «Sanoatqurilishbank» tomonidan O‘zbekiston tiklanish va taraqqiyot jamg‘armasi, Osiyo taraqqiyot banki va boshqa xorijiy kredit liniyalaridan foydalangan holda moliyalashtiriladi.
Reklama huquqi asosida
